ლეიბორისტული პარტიის ლიდერი შალვა ნათელაშვილი Eagle Hills-თან გაფორმებული ხელშეკრულების გამო სისხლის სამართლის საქმის აღძვრას და დამნაშავეების პასუხისგებაში მიცემას ითხოვს.

მისი თქმით, უნდა შეწყდეს კონტრაქტის მოქმედება, რადგან მისი გაფორმება განხორციელებულია ქვეყნის კანონმდებლობისა და საერთაშორისო სამართლის უხეში დარღვევით დისკრიმინაციული წესით და მიზნად ისახავს "ქართული გენის, ქართული ხმის გადაშენებას და დემოგრაფიული კატასტროფის გაღრმავებას". განცხადება ნათელაშვილმა გენერალური პროკურატურის შენობასთან გააკეთა.

"როდესაც 40 წლის უკან მე, აი, ამ პროკურატურის შენობას ვაგებდი, ვერასოდეს წარმოვიდგენდი, რომ ერთ მშვენიერ დღეს ქვეყნის სათავეში მოექცეოდა კრიმინალი, ოლიგარქი, მილიარდერი, რომელიც პროკურატურას გადააქცევდა პირადი მომსახურების სერვისად, გაყიდდა 10 მილიონ კვადრატულ მამულს, ქართულ მიწას კრწანისსა და ლოჭინში უკანონოდ და ამგვარ დანაშაულზე საუკუნისა პროკურატურას არ ექნებოდა რეაქცია, რის გამოც მე მომიწევდა, აი, აქ მოსვლა და სპეციალური მიმართვის გადაცემა იმისათვის, რომ აღიძრას სისხლის სამართლის საქმე და ყველა დამნაშავე, ივანიშვილიდან დაწყებული, ქვემოთ, მიეცეს პასუხისგებაში, რაც აი ამ სამარცხვინო დოკუმენტის გაფორმებით დაიმსახურეს.

დარღვეულია საქართველოს კონსტიტუცია, გასხვისებულია, გაჩუქებულია ქართული მიწა, განწირულია 600 ჰექტარი ტყე გასაკაფად და გამზადებულია იურიდიული ბაზა არაბული დასახლებების მშენებლობისათვის, რათა საბოლოოდ აქ ქართული ჯიში და ჯილაგი გადაშენდეს, რასაც ვერ მოესწრებიან.

მე მოვითხოვ, დაუყოვნებლივ იქნას აღძრული სისხლის სამართლის საქმე, მიეცნენ დამნაშავეები პასუხისგებაში, შეწყდეს კონტრაქტის მოქმედება, რადგან მისი გაფორმება განხორციელებულია ქვეყნის კანონმდებლობის, საერთაშორისო სამართლის უხეში დარღვევით, დისკრიმინაციული წესით და მიზნად ისახავს აქ გადააშენოს ქართული გენი, ქართული ხმა და გააღრმავოს დემოგრაფიული კატასტროფა.

დარღვეულია სისხლის სამართლის კოდექსი, ადმინისტრაციულ სამართალდარღვევათა კანონმდებლობა, დარღვეულია მსოფლიოში აღიარებული, ცივილიზებული წესები კონტრაქტის გაფორმებისა, როდესაც შემომსვლელ მხარეს, ანუ არაბულ კომპანიას, არავითარი ვალდებულება არ ეკისრება, გარდა იმისა, რომ ტყე გაჩეხოს, გააცამტვეროს ყველაფერი, რაც აქ დახვდება, ააშენოს არაბებისათვის უძვირფასესი პენტჰაუზები და ნებისმიერ დროს მიიღოს ნებისმიერი გადაწყვეტილება ისე, რომ არაფერი სახელმწიფოს არ ჰკითხოს და უფრო მეტიც, სახელმწიფოს რომ დასჭირდეს ამ 10 მილიონ კვადრატულ მეტრზე შესვლა და რაღაცის შემოწმება, ამისათვის არაბული კომპანიის ნებართვაა საჭირო", — განაცხადა შალვა ნათელაშვილმა.

შეგახსენებთ, რომ შალვა ნათელაშვილმა 2026 წლის 28 აგვისტოს საზოგადოებას გამართულ საგანგებო ბრიფინგზე აცნობა, რომ მისმა პარტიამ მოიპოვა Eagle Hills-თან გაფორმებული გასაიდუმლოებული დოკუმენტი, რომელსაც "მოღალატეობის ქარტია" უწოდა. დღეს კი, მან უკვე ოფიციალურად მიმართა გენერალურ პროკურატურას საქმის აღძვრის მოთხოვნით.