პარლამენტის ვიცესპიკერი ნინო წილოსანი ისლანდიაში ევროკავშირში გაწევრიანების შესახებ მოლაპარაკებების განახლების შესახებ რეფერენდუმის შედეგებს ეხმაურება და ორმაგ სტანდარტს მიაწერს იმ ფაქტს, რომ "ისლანდია ამ დრომდე არავის დაუდანაშაულებია რუსული გავლენების გამტარებლად", მაშინ როცა ამომრჩეველთა 52.8%-მა უარი თქვა ევროკავშირთან მოლაპარაკებების გაგრძელებაზე.

"ისლანდია ამ დრომდე არავის დაუდანაშაულებია რუსული გავლენების გამტარებლად?! ეტყობა მათ ადგილობრივი ნინო ლომჯარიები და ეკა გიგაურები არ ჰყავთ და ამ ქვეყნის სუვერენიტეტს უფრო მეტი პატივი სცეს გარე აქტორებმაც.

29 აგვისტოს ისლანდიაში ჩატარებულ რეფერენდუმზე — გაგრძელდეს თუ არა ევროკავშირთან მოლაპარაკებები და შესაბამისად, ევროკავშირში გაწევრიანების პროცესი — მონაწილეთა 52.8%-მა უარყოფითი პასუხი გასცა, ანუ უარი თქვა მოლაპარაკებების განახლებაზე. ეს იმ ფონზე, როდესაც რეფერენდუმზე 82.5%-იანი აქტივობა დაფიქსირდა.

"რატომ უნდა მივცეთ უფრო მეტი გადაწყვეტილების მიღების ძალა ევროკავშირის ინსტიტუციებს?"

"ჩვენ გვინდა, გადაწყვეტილებები მიიღებოდეს ჩვენს ქვეყანაში. მომავალში ისლანდიის შესახებ გადაწყვეტილებებს უნდა იღებდეს ისლანდია".

სწორედ ეს იყო ის ძირითადი მესიჯები, რომლებიც რეფერენდუმამდე ჟღერდებოდა და რამაც საბოლოო შედეგი განაპირობა — ქვეყნის სუვერენიტეტის შენარჩუნება, ეკონომიკური ინტერესების დაცვა და გეოპოლიტიკური რისკების გათვალისწინება
ამავდროულად, ფაქტად რჩება ისიც, რომ 2013 წლიდან ევროკავშირთან გაყინულმა მოლაპარაკებებმა ისლანდიის მოსახლეობას დაანახა, რომ პროცესები ბრიუსელის ბიუროკრატიაში კოროზირდა და არაფერი აქვს საერთო ევროკავშირის იმ იდეასთან, საითაც ყველა ვისწრაფოდით", — წერს ნინო წილოსანი სოციალურ ქსელში.

შეგახსენებთ, რომ ისლანდიაში 29 აგვისტოს ევროკავშირში გაწევრიანების შესახებ მოლაპარაკებების განახლების შესახებ რეფერენდუმი ჩატარდა. ამ ინიციატივის წინააღმდეგ ხმა მისცა მოსახლეობის 52.8%-მა, ხოლო 47.2%-მა მოლაპარაკებების განახლებას დაუჭირა მხარი.