პრემიერმინისტრი, რომელმაც გუშინ ექსპრეზიდენტზე საუბრისას თქვა, რომ ადამიანებს თვითმკვლელობის უფლება აქვთ, ახლა ამტკიცებს, რომ ის არ უგულისხმია, რაც საზოგადოებამ გაიგო. კრიტიკის შემდეგ ირაკლი ღარიბაშვილი აცხადებს, რომ მას არა თვითმკვლელობა, არამედ შიმშილობა უნდა ეთქვა. თუმცა პრემიერი არ ამბობს, რომ სიტყვა შეეშალა და ირწმუნება, რომ მისი ნათქვამის არასწორი ინტერპრეტაცია მოხდა.

"მე გუშინ, საზოგადოებას მინდა რომ გავუმარტო, ბუნებრივია, ვსაუბრობდი შიმშილობაზე და შიმშილობის დეფინიცია არის განსაზღვრული კანონმდებლობაში და სწორედ ამაზე მქონდა მე საუბარი. შემდეგ საუბარი იყო თვითმკვლელობაზეც და შემდეგ შეიძლება არასწორი ინტერპრეტაცია მოხდა ჩემი ნათქვამის. რა თქმა უნდა, ყველა ადამიანის, მათ შორის, დაკავებულის თუ პატიმრის უფლება არის შიმშილობა და მე ვთქვი, რომ ჩვენ ადამიანს და პატიმარს ვერ ავუკრძალავთ შიმშილობას. მე უნდა მეთქვა შიმშილობა და არა თვითმკვლელობა. ალბათ, ამით არასწორი ინტერპრეტაცია მოხდა.

ბუნებრივია, მე აღარ შევალ დეტალებში და კანონის განმარტებას არ დავიწყებ, მაგრამ ერთი რამ მინდა ვთქვა, ჩვენ ადგილზეც გვყავს მობილიზებული ექიმების ჯგუფიც, რეანიმობილიც, აბსოლუტურად სრული მზაობაა", — განაცხადა პრემიერმინისტრმა.

თუმცა, სააკაშვილის შიმშილობაზე საუბრისას ღარიბაშვილმა რამდენჯერმე ახსენა თვითმკვლელობა და თქვა, რომ ადამიანებს ამის უფლება აქვთ და სახელმწიფო ვერ აიღებს პასუხისმგებლობას. წამყვანმა მას ჰკითხა, რა მოლოდინი აქვს სააკაშვილის შიმშილობაზე და "რა შეიძლება იყოს ფინალი", პასუხად კი პრემიერმა განაცხადა:

"ფინალი არ ვიცი ახლა, ადამიანი თუ თავის ჯანმრთელობას იზიანებს... ის კი არა, უფრო მეტიც, კანონში წერია, რომ ადამიანს აქვს თვითმკვლელობის უფლება, თუ ადამიანი გადაწყვეტს რომ თავი მოიკლას, შეუძლია მოიკლას, მაგრამ ამაზე, რა თქმა უნდა, სახელმწიფო ვერ აიღებს პასუხისმგებლობას".

საუბრისას ერთ-ერთმა წამყვანმა აღნიშნა, რომ როდესაც ადამიანი თავს იზიანებს, სახელმწიფო უნდა დაეხმაროს, რასაც ღარიბაშვილი ასე პასუხობს: "დავემხარებით, გადავიყვანთ საჭირო დროს, საჭიროების შემთვევაში, გლდანის საავადმყოფოში"

ამავე თემაზე: