პროკურატურის მოთხოვნით, სააპელაციო სასამართლომ 4 ოქტომბრის საქმეზე დაკავებული გიორგი კირვალიძისთვის საპროცესო შეთანხმება გააუქმა და საქმე საქალაქო სასამართლოში დასკვნითი სიტყვების ეტაპზე დააბრუნა.

24 ივნისს 4 ოქტომბრის საქმეზე დაკავებულ 12 ბრალდებულს საპროცესო შეთანხმება გაუფორმდა. წინა საპროცესო შეთანხმებებისგან განსხვავებით, აღნიშნულ ბრალდებულებს სპეცრაზმელებზე თავდასხმაც ედებოდათ ბრალად, რის გამოც პროკურატურამ მათ 1 წლით პატიმრობა და 3-წლიანი პირობითი მსჯავრი განუსაზღვრა.

საპროცესო შეთანხმების გაფორმების შემდეგ, სასამართლო პროცესზე გიორგი კირვალიძემ განაცხადა: "თავს დამნაშავედ არ ვცნობ, გააუქმეთ [საპროცესო შეთანხმება]. ბიძინას დედასაც შ****ი".

ადვოკატ ბორის (ჩელე) ყურუას შეფასებით, სასამართლომ მის დაცვის ქვეშ მყოფს განაჩენი პრაქტიკულად უკვე გამოუტანა და მისი უდანაშაულოდ ცნობის შანსები არ არსებობს.

"სიმართლის პოვნა იქნება ძალიან რთული. დამტკიცდა მახინჯი პრაქტიკა, როდესაც საქმე საქალაქო სასამართლოს დაუბრუნდა არსებითი განხილვის ეტაპზე, რა დროსაც პრაქტიკულად შეუძლებელია გამამართლებელი განაჩენის დადგომა და ნორმალურ პირობებშიც კი არ მოიძებნება მოსამართლე, ვინც დაიჯერებს, რომ ჩემი დაცვის ქვეშ მყოფი უდანაშაულოა. პროკურორის სარჩელის დაკმაყოფილება ნიშნავს, რომ მოსამართლემ ხელი მოაწერა გამამტყუნებელ განაჩენს," — განაცხადა ადვოკატმა.

კირვალიძეს ბრალად ედებოდა ჯგუფურად სტრატეგიული და განსაკუთრებული მნიშვნელობის ობიექტის ხელში ჩაგდების მცდელობა და ორგანიზებულ ჯგუფურ ძალადობაში მონაწილეობა.