პარლამენტის თავმჯდომარის, შალვა პაპუაშვილის განცხადებით, ქართული მხარე მზად არის, ამერიკის შეერთებულ შტატებთან ურთიერთობებში არსებული "ფურცელი გადაშალოს" და სტრატეგიული პარტნიორობა ახალი ეტაპიდან დაიწყოს. ამის შესახებ მან ბრიფინგზე განაცხადა.

პაპუაშვილი აცხადებს, რომ საქართველო ყოველთვის იყო აშშ-ის კეთილსინდისიერი პარტნიორი და ამჟამად ვაშინგტონთან პოზიტიური დინამიკა შეინიშნება.

აშშ-სთან ურთიერთებში პოზიტიური დინამიკა გამოიხატება შემდეგში: არსებობს კონტაქტები ადმინისტრაციებს შორის, ის, რომ დელეგაცია იყო ჩამოსული, რომლებთანაც იყო ძალიან ნაყოფიერი შეხვედრები და ჩვენ ამ იმედით ვუყურებთ ჩვენს სამომავლო ურთიერთობებს. კიდევ ერთხელ, ჩვენ არაერთხელ გვითქვამს: ჩვენ ვართ მზად, რომ მიუხედავად იმ გადაწყვეტილებებისა, რომელიც წინა ადმინისტრაციამ მიიღო ორ ქვეყანას შორის ურთიერთობებთან დაკავშირებით — და მავნე გადაწყვეტილებებით, რომლითაც სტრატეგიული პარტნიორობა გააუქმა, შეეცადა არჩევნებში ჩარევას და ა.შ. — ჩვენ მზად ვართ, რომ ეს ფურცელი გადავშალოთ და გავხედოთ წინ, გამომდინარე იქიდან, რომ ჩვენ ყოველთვის ვიყავით კეთილსინდისიერი პარტნიორი ამერიკის შეერთებული შტატების და ზოგადად ყველა იმ ქვეყნის, რომელიც ჩვენს ქვეყანას პატივს სცემს.

ჩვენი სურვილი არის და ეს, როგორც დახურულ შეხვედრებზე, ისე საჯაროდაც გვითქვამს — ჩვენი სურვილი არის, რომ სტრატეგიული პარტნიორობა, რომელშიც საქართველომ თავის დროზე, შესაძლოა უფრო მეტი გააკეთა თავისი მასშტაბებიდან გამომდინარე, ვიდრე ამერიკის შეერთებული შტატების წინა ადმინისტრაციამ, ეს სტრატეგიული ურთიერთობა დაიწყოს ახალი ფურცლიდან. ეს სურვილი გამოვთქვით. ვისაც სურვილი აქვს, რომ ჩვენთან იმეგობროს და ჰქონდეს სტრატეგიული პარტნიორობა, ჩვენ მზად ვართ ამისთვის. ჩვენ სხვა ქვეყნების გადაწყვეტილებაზე გავლენას ვერ მოვახდენთ. ერთადერთი ვიცით, რომ ყველას ინტერესში არის, რომ ჰქონდეს პარტნიორული ურთიერთობა საქართველოსთან, მათ შორის ჩვენი ქვეყნის გეოპოლიტიკური მნიშვნელობიდან გამომდინარე", — განაცხადა შალვა პაპუაშვილმა.