რეგიონული პოლიტიკის საკითხებში სახელმწიფო მინისტრის თანამდებობა, რომელიც მამუკა მდინარაძისთვის იქმნებოდა აღარ შეიქმნება, ამის შესახებ პარლამენტის თავმჯდომარის, შალვა პაპუაშვილის ბრიფიგინდან გახდა ცნობილი.

ამას გარდა, როგორც მან თქვა, მიდის მსჯელობა იმაზე, რომ რეგიონული განვითარების და ინფრასტრუქტურის სამინისტროები გაერთიანდება. გაერთიანებულ სამინისტროში მინისტრის პოსტს კი, სავარაუდოდ, რევაზ სოხაძე დაიკავებს, რომელიც ამჟამად საქართველოს ინფრასტრუქტურის მინისტრია.

"ამ სასესიო კვირაში ალბათ არა, მომავალ სასესიო კვირაში გვექნება მსჯელობა. ეს პოზიცია აღარ შეიქმნება სახელმწიფო მინისტრის. იცით, რომ თავის დროზე დაანონსდა, რომ გაუქმდებოდა სამართალდამცავი ორგანოების კოორდინირების მიმართულებით სახელმწიფო მინისტრის პოზიცია, შეიქმნებოდა რეგიონული მიმართულებით. გაუქმდება სამართალდამცავი ორგანოების კოორდინაციის ფუნქციის მქონე სახელმწიფო მინისტრის პოზიცია, არ შეიქმნება რეგიონული მიმართულებით კოორდინაციის საკითხებში სახელმწიფო მინისტრის პოზიცია და მსჯელობა მიდის და სავარაუდოდ მოხდება რეგიონული განვითარების სამინისტროს და ინფრასტრუქტურის სამინისტროს გაერთიანება", — განაცხადა პაპუაშვილმა..

"ტვ პირველის" ჟურნალისტის კითხვაზე, რამ გამოიწვია აღნიშნული ცვლილებები?, პაპუაშვილი აცხადებს, რომ გამომდინარე იქიდან, რომ მამუკა მდინარაძემ მიიღო გადაწყვეტილება, რომ პოლიტიკიდან წასულიყო, ახალი სახელმწიფო მინისტრის საჭიროება აღარ არის.

"ის ამოცანები, რომელიც მათ შორის სამართალდამცავი ორგანოების კოორდინაციის სახით დააკისრა პრემიერმინისტრმა მამუკა მდინარაძეს, ეს იყო მისი პირადი შესაძლებლობებიდან გამომდინარე და ეს ფუნქცია მან ძალიან კარგად შეასრულა და ეს კოორდინაცია დღეს არის ძალიან კარგად აწყობილი. და სურვილი იყო, რომ რეგიონული მიმართულებითაც იგივე გაკეთებულიყო კოორდინაციის მხრივ. გამომდინარე იქიდან, რომ მამუკა მდინარაძემ მიიღო გადაწყვეტილება, რომ პოლიტიკიდან წასულიყო, აქედან გამომდინარე ეს საჭიროება აღარ არის, გამომდინარე იქიდან, რომ სწორედ მამუკა მდინარაძის პირადი შესაძლებლობებიდან გამომდინარე იყო ჩაფიქრებული ამ პოზიციის შექმნა", — განაცხადა პაპუაშვილმა.

კითხვაზე, ვინ გახდება რეგიონული განვითარების და ინფრასტრუქტურის მინისტრი, პარლამენტის თავმჯდომარე ამბობს, რომ "ამ მხრივ რევაზ სოხაძე ძალიან კარგად გაართმევს თავის მოვალეობას თავს".

შეგახსენებთ, რომ 2025 წლის აპრილში რეგიონული განვითარებისა და ინფრასტრუქტურის სამინისტრო ორ დამოუკიდებელ უწყებად გაიყო: საქართველოს რეგიონული განვითარების სამინისტრო და საქართველოს ინფრასტრუქტურის სამინისტრო. რევაზ სოხაძე ინფრასტრუქტურის მინისტრად დაინიშნა, ხოლო რეგიონული განვითარების მინისტრი — კახაბერ გულედანი გახდა.

30 ივლის მთავრობის ადმინისტრაციაში გამართულ ბრიფინგზე მთავრობის მეთაურმა, ირაკლი კობახიძემ განაცხადა, რომ რეგიონული განვითარების მოქმედი მინისტრი კახა გულედანი საქართველოს ინფრასტრუქტურის მინისტრის პირველი მოადგილის თანამდებობაზე გადავიდოდა.