მიხეილ სააკაშვილის პირადი ექიმი ნიკოლოზ ყიფშიძე ამბობს, რომ ექსპრეზიდენტი თანახმაა, გაიკეთოს ანალიზები. მისი თქმით, სააკაშვილი ამ ეტაპზე სუსტადაა, ამიტომ ანალიზების გაკეთება ხვალვე სურთ. მისივე თქმით, ჩატარდება ყველანაირი კვლევა, რასაც იქამდე აკეთებდნენ, სანამ სააკაშვილი უარს იტყოდა.

"ციხის ექიმებთან ერთად ჩვენ ვთხოვეთ პრეზიდენტს, თუ შეიძლება ერთი ტესტი კიდე გავაკეთოთ, იმიტომ, რომ არ მოგვწონს ჩვენ მდგომარეობა, რაზეც დაგვთანხმდა", — თქვა ყიფშიძემ.

როგორც ექიმი ამბობს, თავად მოითხოვს ჰოსპიტალიზაციას, მაგრამ ამას ორივე კონსილიუმი გადაწყვეტს, როგორც მთავრობის შემქნილი, ისე ალტერნატიული.

მიხეილ სააკაშვილი პენიტენციურ დაწესებულებაში უკვე 33 დღეა შიმშილობს. მან შიმშილობა დაკავების დღიდან გამოაცხადა. 29 ოქტომბერს ექსპრეზიდენტმა თქვა, რომ ის უარს ამბობს ექიმთა კონსილიუმთან თანამშრომლობაზე. მისი თქმით, ის აღარ ჩააბარებს ანალიზებს და არ მიიღებს შიმშილობის შემამსუბუქებელ მკურნალობას.

მანამდე, 28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

ექსპრეზიდენტის სამოქალაქო კლინიკაში გადაყვანის შესახებ ხელისუფლებას მოუწოდებენ პოლიტიკური პარტიები, ორგანიზაციები, სამედიცინო მუშაკები. თუმცა ისინი ამაზე უარს ამბობენ და აცხადებენ, რომ პენიტენციურ დაწესებულებაში შექმნილია ყველა პირობა იმისთვის, რომ პატიმარს უმკურნალონ. იუსტიციის მინისტრის, რატი ბრეგაძის თქმით, საჭიროების შემთხვევაში სააკაშვილს სწორედ ციხის სამედიცინო განყოფილებაში გადაიყვანენ. ამის წინააღმდეგია ექსპრეზიდენტი და ამბობს, რომ როგორიც არ უნდა იყოს მისი ჯანმრთელობის მდგომარეობა, უარს აცხადებს ციხის საავადმყოფოში გადაყვანაზე.