ქართული ოცნების აღმასრულებელი მდივანი, მამუკა მდინარაძე მიხეილ სააკაშვილის შიმშილობასთან დაკავშირებით დასმულ კითხვაზე პასუხობს, რომ 41-ე დღეს ელოდებიან და დარწმუნებულია, ექსპრეზიდენტი ამ დროს ჯანსაღად იქნება.

"ასე გაგვიგია ყველას, რომ 40 დღე ძლებს ადამიანი და 41-ე დღეს ველოდებით და ჯანსაღად იქნება ეს ადამიანი, დარწმუნებული ვარ", — აცხადებს მდინარაძე.

მისივე თქმით, გარკვეული ეჭვები არსებობს სააკაშვილის შიმშილობასთან დაკავშირებით და მან მოუწოდა ექსპრეზიდენტს, იუსტიციის სამინისტროსა და პენიტენციუს სამსახურს უფლება მისცეს, მისი პერსონალური მონაცემები გაასაჯაროვოს.

"მე მოვუწოდე ამ ადამიანს და თქვენი მხრიდან გამოხმაურებაც არ ყოფილა იმასთან დაკავშირებით, რომ გაასაჯაროვებინოს, მისი პერსონალური მონაცემების გახმოვანების საშუალება მისცეს პენიტენციურ სამსახურს, იუსტიციის სამინისტროს და მერე ვნახოთ, შემთხვევით ფეიქი ხომ არ შიმშილობა, ან ნახევრად შიმშილობა ხომ არ არის და ა.შ.

გარკვეული ეჭვები არსებობს საზოგადოებაში და მოდი ამაზე ვილაპარაკოთ, მაგრამ ამას რომ თავი დავანებოთ, ყველა პატიმარზე, რომელთა ჯანმრთელობის მდგომარეობასთან დაკავშირებით გარკვეული რისკები არსებობს, იმას მიხედავს იუსტიციის სამინისტრო, ამიტომ", — აცხადებს მდინარაძე.

ექსპრეზიდენტი, მიხეილ სააკაშვილი პენიტენციურ დაწესებულებაში უკვე 1 თვეა შიმშილობს. მან შიმშილობა დაკავების დღიდან გამოაცხადა.

29 ოქტომბერს ექსპრეზიდენტმა თქვა, რომ ის უარს ამბობს ექიმთა კონსილიუმთან თანამშრომლობაზე. მისი თქმით, ის აღარ ჩააბარებს ანალიზებსა და არ მიიღებს შიმშილობის შემამსუბუქებელ მკურნალობას.

"ვასრულებ ამ თანამშრობლობას, მადლობელი ვარ კონსილიუმის წევრების და სამწუხაროა, რომ მთავრობამ არ გაითვალისწინა მათი მთავარი რეკომენდაცია", — აცხადებს ის.

მანამდე, 28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

ექსპრეზიდენტის სამოქალაქო კლინიკაში გადაყვანის შესახებ ხელისუფლებას მოუწოდებენ პოლიტიკური პარტიები, ორგანიზაციები, სამედიცინო მუშაკები.

გაიგე მეტი:

მიხეილ სააკაშვილი პირველ ოქტობერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

მისი პირადი ექიმის, ნიკოლოზ ყიფშიძის განცხადებით, სააკაშვილი გლდანის ციხეში მკურნალობის კატეგორიულად წინააღმდეგია. ექიმის ცნობით, კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.

რაც შეეხება პრემიერმინისტრ ღარიბაშვილს, ის აცხადებს, რომ ციხის საავადმყოფოში ყველა პირობა არის შექმნილი და ეს გადაწყვეტილება "არ გადაიხედება".