აზერბაიჯანის პრეზიდენტი ილჰამ ალიევი სომხეთის პრემიერმინისტრ ნიკოლ ფაშინიანს 2026 წლის 31 აგვისტოს, ბიშკეკში, შანხაის თანამშრომლობის ორგანიზაციის (SCO) სამიტის ფარგლებში შეხვდა. შეხვედრის შესახებ ინფორმაციას აზერბაიჯანის პრეზიდენტის ადმინისტრაცია ავრცელებს.

ლიდერებმა ხაზი გაუსვეს 2025 წლის 8 აგვისტოს ვაშინგტონის სამშვიდობო სამიტის დროს 2 ქვეყნის ლიდერების მიერ ხელმოწერილს დეკლარაციას, რომელიც ასევე აშშ-ის პრეზიდენტის, დონალდ ტრამპის მიერ იყო დამოწმებული.

"მხარეებმა მშვიდობის დივიდენდების მნიშვნელოვან გამოვლინებად დაასახელეს აზერბაიჯანული ნავთობპროდუქტების ექსპორტი სომხეთში, მესამე ქვეყნებში წარმოებული მარცვლეულისა და სხვა საქონლის აზერბაიჯანის ტერიტორიის გავლით სომხეთში ტრანზიტი, ასევე ორ ქვეყანას შორის სავაჭრო ურთიერთობების დამყარება. ლიდერებმა ასევე დადებითად შეაფასეს ბიზნესწრეებს შორის კონტაქტები და გაცვალეს მოსაზრებები ორმხრივად მომგებიანი ეკონომიკური, სავაჭრო და ენერგეტიკული თანამშრომლობის შემდგომი გაფართოების შესაძლებლობებზე.

მხარეებმა აღნიშნეს აზერბაიჯანსა და სომხეთს შორის სახელმწიფო საზღვრის დელიმიტაციის საკითხზე შექმნილი შესაბამისი სახელმწიფო კომისიების მნიშვნელოვანი როლი და ხაზი გაუსვეს მათი მუშაობის გაგრძელების მნიშვნელობას, ორ ქვეყანას შორის მიღწეული შეთანხმებების შესაბამისად.

ლიდერებმა განიხილეს შემდგომი პრაქტიკული ნაბიჯები "ტრამპის საერთაშორისო მშვიდობისა და კეთილდღეობის მარშრუტის" (TRIPP) განხორციელებასთან დაკავშირებით. ეს მარშრუტი ვაშინგტონის სამშვიდობო სამიტის ერთ-ერთი მნიშვნელოვანი შედეგია. მათ ასევე ხაზი გაუსვეს TRIPP-ის ფარგლებში საკომუნიკაციო და სატრანსპორტო პროექტების მნიშვნელობას.

ლიდერებმა დადებითად შეაფასეს პარლამენტარებისა და სამოქალაქო საზოგადოების წარმომადგენლების მონაწილეობით მიმდინარე ნდობის აღდგენის მიზნით განხორციელებული კონტაქტები და აღნიშნეს მათი წვლილი ურთიერთნდობის გაძლიერებასა და უფრო ფართო სამშვიდობო დღის წესრიგის მხარდაჭერაში.

პრეზიდენტი ილჰამ ალიევი და პრემიერმინისტრი ნიკოლ ფაშინიანი შეთანხმდნენ, რომ პირდაპირი ორმხრივი დიალოგის გზით გააგრძელებენ ნაბიჯების გადადგმას ხანგრძლივი მშვიდობის განმტკიცების, სახელმწიფოთაშორისი ურთიერთობების ნორმალიზაციისა და რეგიონში კავშირების გაძლიერების მიმართულებით", — წერია გავრცელებულ ინფორმაციაში.