ზუგდიდში საარჩევნო უბანთან მყოფი პირი ჟურნალისტს ელექტროშოკით ემუქრებოდა და შეურაცხყოფას აყენებდა. ტელეკომპანია ფორმულას გავრცელებულ კადრებში ჩანს, რომ აღნიშნული პირი უახლოვდება მათ ჟურნალისტს, ეუბნება რომ არ გადაუღოს და თან ელექტროშოკს რთავს.

ჟურნალისტი მას უხსნის, რომ კადრებს იღებს, რის შემდეგაც ის ამბობს: "მიგადებ იცოდე. მიგადებ-მეთქი, მე შენ გითხარი".

ის ყვირის, ითხოვს, რომ შეწყვიტონ გადაღება და ხელით იწევს ჟურნალისტისკენ. მის შეჩერებას თანმხლები პირი ცდილობს და მანქანაში სვამს, თუმცა ის მაინც აგრძელებს გინებას და მუქარას ჟურნალისტებისადმი.

"დაგემუქრები კი არა, მიგადებ-მეთქი და იმ კამერას ტ**კში გაგიკეთებ" — უყვირის ის ჟურნალისტებს იქამდე, სანამ ტერიტორიას დატოვებს.

ჟურნალისტი On.ge-სთან ამბობს, რომ მომხდარზე გამოძიება სისხლის სამართლის კოდექსის 154-ე მუხლით დაიწყო, რაც ჟურნალისტისათვის პროფესიულ საქმიანობაში უკანონოდ ხელის შეშლას გულისხმობს. ამ თემაზე On.ge კომენტარს ელოდება შინაგან საქმეთა სამინისტროსგანაც.