სან-სებასტიანის კინოფესტივალის ჟიურის თავმჯდომარე წელს ქართველი რეჟისორია

თანამედროვე კინოსამყაროში ერთ-ერთ ყველაზე ცნობილ და აღიარებულ ევროპულ კინოფესტივალს ქართველი ხელოვანი — დეა კულუმბეგაშვილი უხელმძღვანელებს.

სან-სებასტიანის კინოფესტივალის წლევანდელი გამოშვების ჟიურის თავმჯდომარე ახალგაზრდა ქართველი რეჟისორი ქალი იქნება, რომელიც გასულ წელს ამავე ფესტივალის ტრიუმფატორი გახდა: დეა კულუმბეგაშვილის სადებიუტო სრულმეტრაჟიანმა კინოსურათმა დასაწყისი სან-სებასტიანის 2020 წლის კინოფესტივალზე ოთხ ნომინაციაში გაიმარჯვა, მათ შორის საუკეთესო ფილმისა და რეჟისორის კატეგორიაში.

სან-სებასტიანის კინოფესტივალი ესპანეთში 1953 წლიდან იმართება და ა-კლასის საერთაშორისო ფესტივალია, რომელსაც ყოველწლიურად უამრავი ვარსკვლავი სტუმრობს: მაგალითად, წელს მიწვეულ სტუმრებს შორის არიან ხავიერ ბარდემი, ჯესიკა ჩესტეინი, მარიონ კოტიარი და ჯონი დეპი.

დეა კულუმბეგაშვილი ჯამში ხუთწევრიან ჟიურის ხელმძღვანელობს და მათთან ერთად გამოავლენს წლევანდელი ფესტივალის ფავორიტ ფილმებს, მსახიობებსა თუ რეჟისორებს, რომელთა ნამუშევრებს 17-25 სექტემბრის პერიოდში აჩვენებენ და შეაფასებენ.

აღსანიშნავია, რომ კულუმბეგაშვილი შარშანდელ კანის კინოფესტივალზე ერთ-ერთი სექციის ჟიურის წევრიც იყო და საუკეთესო მოკლემეტრაჟიანი ფილმების გამოვლენაში მიიღო მონაწილეობა.

მისი გახმაურებული ფილმის დასაწყისი შესახებ რეცენზია წაიკითხეთ აქ: ცვლილებების დასაწყისი