დაავადებათა კონტროლისა და საზოგადოებრივი ჯანმრთელობის ცენტრის დირექტორი, ამირან გამყრელიძე ამბობს, რომ ვაქცინაციის კამპანიის ბანერების განთავსების ვადა წლის ბოლომდე იყო. მან, ფაქტობრივად დაადასტურა, რომ სარეკლამო კომპანიამ ხელშეკრულება დაარღვია.

"ხელშეკრულებას ვადა ჰქონდა 31 დეკემბრამდე ამ წლის [...] იქ იურიდიული ნიუანსებია, რომლებიც უნდა გაიარონ სარეკლამო კომპანიამ და ჩვენებმა, კიდევ, დამატებით, რომ ჩვენ რა პასუხისმგებლობას ვიღებდით და რა პასუხისმგებლობას სარეკლამო კომპანია, მაგრამ გიდასტურებთ, რომ ხელშეკრულების მოქმედების ვადა იყო წლის ბოლომდე", — განაცხადა მან საზოგადოებრივი მაუწყებლის ეთერში.

გამყრელიძის ინფორმაციით, ამ სარეკლამო კომპანიასთან (ალმა) აქამდეც თანამშრომლობდნენ და ამიტომ, იმედი აქვს, რომ საქმე სასამართლომდე არ მივა. ასე უპასუხა მან კითხვას, ხომ არ გაასაჩივრებს ხელშეკრულების დარღვევას სასამართლოში.

"მე ძალიან დიდი იმედი მაქვს, რომ ეს არ მივა იმ დავამდე, რომელიც, შემდგომ უნდა გაირჩეს სხვადასხვა ორგანოებში და ისინი დაჰყვებიან მთლიანად მოსახლეობის ნებას და მათ შორის, ჩვენს მიმართვასაც, რომ დიახ, ყველა სარეკლამო ბანერზე დღეს საერთოდ, ეს არის ჩვენი სურვილი, უპირველესი თემა ქვეყანაში უნდა იყოს ვაქცინაცია", — განაცხადა ამირან გამყრელიძემ.

კითხვას, იყო თუ არა ვაქცინაციის ბანერების პოლიტიკური შინაარსის ბანერებით ჩანაცვლება პოლიტიკური ჩარევის შედეგი, გამყრელიძემ ასე უპასუხა:

"მე ამ პოლიტიკურ ნიუანსებში არასოდეს არ შევდივარ. ვცდილობ, რომ ყოველთვის გვერდი ავუარო პოლიტიკურ კითხვებს. მე არ ვიცი, რა იყო იქ ქვედინებები, მაგრამ, ის, რომ ვაქცინაციის ბანერის ნებისმიერი — იყო ეს პოლიტიკური თუ სხვა ტიპის ბანერით შეცვლა ნამდვილად არ წაადგება ქვეყანას."

17 სექტემბერს, თბილისში გვიან ღამით ბანერი წარწერით "არა ნაცებს, არა ბოროტებას" ისევ გამოჩნდა. Facebook-ზე გავრცელდა ფოტოც, სადაც ჩანს, რომ პოლიტიკური პლაკატი ვაქცინაციის მოწოდების ბანერს გადააკრეს. 18 სექტემბერს NCDC-მა განცხადება გაავრცელა და ვაქცინაციის მოწოდების ბანერების ჩანაცვლება დაგმო.

თავად კომპანია ალმამ დღეს განცხადება გაავრცელა, სადაც განმარტავენ, რომ ფუნქცია მხოლოდ ბილბორდების კონსტრუქციის ფართის გაყიდვა/გაქირავებაა და მათ ვიზუალზე პასუხისმგებლობას იხსნიან. თუმცა, კომპანიაში, ასევე, აცხადებენ, რომ ე.წ. "სისხლიანი" ბანერების შინაარსი მათთვის მიუღებელია. კომპანიის განცხადებაში არაფერია ნათქვამი ხელშეკრულების დარღვევაზე.

გაიგე მეტი: