ავსტრალიის მოქალაქის, შანაი ბრუკის გარდაცვალების საქმეზე დაკავებულ რაფაელ მურსაკულოვს ბრალი დამამძიმებელ გარემოებებში განზრახ მკვლელობისა და ყაჩაღობის მუხლით წარედგინა. პროკურატურა აღკვეთის ღონისძიების სახით მისთვის პატიმრობის შეფარდებას ითხოვს.

"გამოძიებით დადგინდა, რომ 2021 წლის 30 ივლისს, დაახლოებით 16:00 საათზე, თბილისში, მთაწმინდის პარკის მიმდებარე ტერიტორიაზე, ბრალდებული ყაჩაღურად, პირადი ნივთების დაუფლების მიზნით თავს დაესხა შანაი ბრუკი ედუარდს. მსხვერპლის მიერ გაწეული წინააღმდეგობის გამო, ბრალდებულმა, ყაჩაღობის გაადვილების და შემდგომში მისი დაფარვის მიზნით, ანგარების მოტივით, მისი მოკვლა გადაწყვიტა.

ბრალდებულმა შანაი ბრუკს დანით კისრის არეში მიაყენა დაზიანება და გაგუდა. ამის შემდეგ იგი მსხვერპლის პირად ნივთებს დაეუფლა და დანაშაულის კვალის დაფარვა სცადა, ცხედარს ხის ტოტები დააფარა, დანაშაულის იარაღი — დანა მიმდებარე ტერიტორიაზე გადააგდო და ადგილიდან მიიმალა", — აცხადებენ პროკურატურაში.

რაფაელ მურსაკულობს ბრალდება საქართველოს სისხლის სამართლის კოდექსის 179-ე მუხლის პირველი ნაწილით და 109-ე მუხლის პირველი ნაწილის გ და მესამე ნაწილის გ ქვეპუნქტებით წარედგინა. ამ მუხლებით განსაზღვრული დანაშაულები სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.

რაფაელ მურსაკულოვი 8 სექტემბერს დააკავეს.

დღეს ცნობილი გახდა, რომ შანაე ბრუკის სამშობლოში გადასვენების ხარჯებს სახელმწიფო დაფარავს.

მიმდინარე წლის 31 ივლისს გავრცელდა ინფორმაცია, რომ მეგობრები თბილისში ავტრალიის მოქალაქეს, შანაი ბრუკს ეძებდნენ. ისინი Facebook-ზე წერდნენ, რომ ქალი 30 ივლისს, დღის მეორე ნახევრიდან, მთაწმინდის რაიონში სეირნობის შემდეგ დაიკარგა. ბრუკის ერთ-ერთი მეგობრის თქმით, შანაე ბოლოს ტელეფონზე მეგობარს ელაპარაკებოდა, როდესაც მას მოულოდნელად თავს დაესხნენ, ის კი დახმარებისას ითხოვდა. დღის ბოლოს გავრცელდა ინფორმაცია, რომ თბილისში შანაე ბრუკი მთაწმინდის ფერდობზე გარდაცვლილი იპოვეს.