2021 წლის ავისტოში, წინა თვესთან შედარებით, ინფლაციის დონემ საქართველოში 0,7%, ხოლო წლიურმა ინფლაციამ 12,8% შეადგინა — ფასების ზრდის ამაზე მაღალი მაჩვენებელი ბოლოს 2011 წლის მაისში დაფიქსირდა, როდესაც წლიური ინფლაცია 14,3% იყო.

ფოტო: საქსტატი

საქსტატის ინფორმაციით, წლიურ ინფლაციაზე ყველაზე დიდი გავლენა სურსათზე ფასების ზრდამ მოახდინა — ამ სასაქონლო ჯგუფში პროდუქცია წლიურად 16,2%-ით გაძვირდა და იქიდან გამომდინარე, რომ სურსათი ადამიანების სამომხმარებლო კალათის დიდ ნაწილს შეადგენს, მასზე ფასების ზრდამ ინფლაციაში 5,09%-იანი წვლილი შეიტანა.

ფასები გაზრდილია ტრანსპორტისა და საცხოვრებელთან დაკავშირებულ ხარჯებსა და ჯანდაცვის სექტორშიც. გაძვირებულია როგორც სასტუმროებისა და რესტორნების მომსახურება, ისე საიჯახო ნივთები.

შეგახსენებთ, რომ ივლისში წლიური ინფლაციის დონე 11,9%, ივნისში — 9,9%, მაისში — 7,7%, ხოლო აპრილსა და მარტში — 7,2% იყო.

აღსანიშნავია, რომ ინფლაციის დარეგულირების მიზნით, საქართველოს ეროვნულმა ბანკმა აგვისტოს დასაწყისში რეფინანსირების განაკვეთი 0,5 პროცენტული პუნქტით, 10%-მდე გაიზარდა, რის შედეგადაც 140 100 ადამიანს სესხის პროცენტი გაუძვირდა.

საერთაშორისო სავალუტო ფონდის (IMF) პროგნოზით, საქართველოში 2021 წლის ბოლოს ინფლაციის წლიური მაჩვენებელი 9,4% იქნება, ხოლო მიმდინარე წლის ინფლაციის საშუალო დონე 7,3%-ს მიაღწევს.

რამდენიმე დღის წინ ეკონომიკის მინისტრმა, ნათია თურნავამ განაცხადა, რომ წლის ბოლომდე მგომარეობა დასტაბილურდება და ინფლაციური პროცესები შემცირდება.