პოლიციელი როლანდ მესხი, რომელმაც 3 დღის წინ 20 წლის სტუდენტ ნატა ჭიოკაძეს თმა მოქაჩა, შსს-ს მინისტრის პირველ მოადგილედ დაინიშნა. როლანდ მესხის ვახტანგ გომელაურის პირველ მოადგილედ დანიშვნის შესახებ ინფორმაცია შინაგანს საქმეთა სამინისტრომ გაავრცელა.

იმის გასარკვევად — ვახტანგ გომელაურის მოადგილედ დანიშნული პირი ნამდვილად ის როლანდ მესხია თუ არა, რომელმაც აქციაზე სტუდენტ გოგოს თმა მოქაჩა NEWS.on.ge შსს-ს პრესსამსახურს დაუკავშირდა. ჩვენს კითხვაზე — ადასტურებთ თუ არა იმას, რომ ვახტანგ გომელაურის მოადგილედ დანიშნულმა როლანდ მესხმა სტუდენტ გოგოს თმა მოქაჩა, ასეთი პასუხი გაგვცეს — "ვადასტურებთ როლანდ მესხის დანიშვნას".

შსს-ს განცხადებაში ვკითხულობთ, რომ როლანდ მესხი მრავალი წლის განმავლობაში შინაგან საქმეთა სამინისტროში სხვადასხვა თანამდებობებზე მუშაობდა, ხოლო 2021 წლის ივლისიდან დღემდე შინაგან საქმეთა სამინისტროს თბილისის პოლიციის დეპარტამენტის დირექტორის მოადგილის პოსტს იკავებდა.

"შინაგან საქმეთა მინისტრის, ვიცე-პრემიერ — ვახტანგ გომელაურის პირველ მოადგილედ როლანდ მესხი დაინიშნა.

როლანდ მესხი მრავალი წლის განმავლობაში შინაგან საქმეთა სამინისტროში სხვადასხვა თანამდებობებზე მუშაობდა, ხოლო 2021 წლის ივლისიდან დღემდე შინაგან საქმეთა სამინისტროს თბილისის პოლიციის დეპარტამენტის დირექტორის მოადგილის პოსტს იკავებდა.

როლანდ მესხი განათლებით სამართალმცოდნეა, 2002 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტი და მიენიჭა იურისტის კვალიფიკაცია.

როლანდ მესხი პოლიციის პოლკოვნიკია და საპოლიციო საქმიანობის მიმართულებით 20 წლიანი სამუშაო სტაჟი აქვს," — ვკითხულობთ განცხადებაში.

სოციალურ ქსელში გავრცელებულ კადრებში ჩანს — 21 აპრილს, რუსთაველის გამზირზე მიმდინარე აქციაზე პოლიციელები როგორ ცდილობენ მოქალაქეებს დაატოვებინონ გზის სავალი ნაწილი, ამ დროს კი როლანდ მესხი 20 წლის ნატა ჭიოკაძეს უკნიდან თმას ქაჩავს.

“არ ვაპირებ მივმართო საგამოძიებო უწყებას. ცხადია არ ვენდობი. თავის გასჭირვებია ამ კაცს, 20 წლის კაცს თმით ითრევს რუსთაველზე, ”— განაცხადა ნატა ჭიოკაძემ 2 დღის წინ "ტვ პირველის" ჟურნალისტთან საუბრისას.

ამ დრომდე ვახტანგ გომელაურის პირველი მოადგილის პოსტს შალვა ბედოიძე იკავებდა. ბედოიძეს დიდმა ბრიტანეთმა სანქციები 10 აპრილს დაუწესა. თავად გომელაური კი აშშ-ის მიერ არის სანქცირებული.