პარლამენტის თავმჯდომარე, კახა კუჭავა აცხადებს, რომ ქვეყნის ევრო-ატლანტიკურ გზას საფრთხე არ ემუქრება. ამ სიტყვებით უპასუხა მან ევროპარლამენტარ ვიოლა ფონ კრამონს, რომელმაც აღნიშნა, რომ მთავრობის გადაწყვეტილებები, მეტყველებს, რომ სულერთია შეუერთდება თუ არა ქვეყანა ევროკავშირს.

"იცოდა წინასწარ, რომ რამე ხდებოდა, თუ ეს მისი ვარაუდი არის?! მისი სკეპტიკური განცხადება მოვისმინეთ, ხელშეკრულებიდან, როგორც თვითონ ამბობდა, ჩვენ გასვლასთან დაკავშირებითაც, თუმცა ფაქტი ერთი არის, რომ მე მასთან პირადად საუბარი მქონდა და ის ძალიან უკმაყოფილო იყო, თუნდაც იმით, რომ საერთოდ არ მოახდინა ნაციონალურმა მოძრაობამ ამის ხელმოწერა. ამიტომ ჯობია, მთელ სურათში შევხედოთ ამ კონტექსტს[...].

საფრთხე არ ემუქრება ჩვენ ევრო-ატლანტიკურ გზას, აუცილებლად გავაგრძელებთ რეფორმებს, აუცილებლად მივაღწევთ იმ სასურველ შედეგს, რასაც ელოდება ჩვენგან ყველა", — განაცხადა კახა კუჭავამ.

პრემიერმინისტრის, ირაკლი ღარიბაშვილის განცხადებით, გადაწყვეტილი აქვთ, რომ ევროკავშირისგან მაკროფინანსური დახმარების მეორე ნაწილის აღებისგან თავი შეიკავონ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება. მანამდე, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს".

ამასთანავე, საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".

გაიგეთ მეტი: