პრემიერმინისტრის, ირაკლი ღარიბაშვილის განცხადებით, გადაწყვეტილი აქვთ, რომ ქვეყანა ევროკავშირისგან მაკროფინანსური დახმარების მეორე ნაწილის აღებისგან თავი შეიკავონ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება.

"რაც შეეხება მაკროფინანსურ დახმარებას, მოსახლეობას შევახსენებ, რომ ეს არის სესხი, რომლის ნაწილიც ავიღეთ 2020 წელს და 75 მილიონი ევროს მეორე ნაწილი სესხი იყო, ასე ვთქვათ, ეს არ იყო, უბრალოდ, გრანტი და დახმარება ეს იყო სესხი, რომლის თაობაზე, ალბათ, მოგვიანებით დამატებით ფინანსთა სამინისტრო გააკეთებს კომენტარს, მაგრამ წელს იქიდან გამომდინარე, რომ ჩვენ უკვე დავიწყეთ საგარეო ვალის შემცირება, მაღალი ალბათობით, ამ თანხის მიღების აუცილებლობა აღარ იქნება. რა თქმა უნდა, ჩვენ ძალიან მადლიერი ვართ ევროკავშირის მთლიანად ყველა იმ დახმარებისთვის, რაც მათ აღმოგვიჩინეს ჩვენ კოვიდპანდემიის მართვის დროს და ზოგადად, ყველაფრისთვის, რაც მათ გააკეთეს და აკეთებენ ჩვენთვის. ჩვენ ამ მიმართულებით გავაგრძელებთ წინსვლას. მეორე მხრივ, ამ საკითხმა შეიძინა ძალიან დიდი პოლიტიკური დატვირთვა, ამიტომ ნებისმიერი ინსინუაციების თავიდან არიდების მიზნით მთავრობა არ გამორიცხავს, ის კი არა ჩვენ გადაწყვეტილიც გვაქვს, რომ თავი შევიკავოთ ამ მეორე ნაწილის სესხის სახით აღებაზე. კიდევ ვიმეორებ, რომ მთავარი არგუმენტაცია, მთავარი მოტივი ამ შემთხვევაში არის ის, რომ ჩვენ ეტაპობრივად დავიწყეთ საგარეო ვალის შემცირება. მოგეხსენებათ, რომ გვაქვს ძალიან კარგი, ძლიერი ეკონომიკური ზრდა, ორნიშნა ეკონომიკური ზრდა", — განაცხადა ღარიბაშვილმა.

ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს". ასე უპასუხა ირაკლი კობახიძემ პალიტრანიუსის ეთერში ჟურნალისტის შეკითხვას, მიდის ქართული ოცნება იმაზე, რომ საქართველო ევროკავშირის მხრიდან მაკროფინანსურ დახმარებას არ მიიღებს.

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".