ეუთო/ODIHR საქართველოში 2 ოქტომბრის არჩევნებისთვის დამკვირვებლებს გამოგზავნის. როგორც მისიის ხელმძღვანელმა თვითმმართველობის არჩევნების სადამკვირვებლო მისიის გახსნის პრესკონფერენციის დროს ისაუბრა, საქართველოში 30 გრძელვადიანი დამკვირვებელი ჩამოვა. მოკლევადიანი დამკვირვებლების რაოდენობად კი 350 ადამიანი განისაზღვრა.

"2 სექტემბერს ჩამოვა 30 გრძელვადიანი დამკვირვებელი, ისინი დააკვირდებიან რეგიონულ დონეზე საარჩევნო პროცესებს და შემდეგ, არჩევნების დღემდე რამდენიმე დღით ადრე ჩვენ მოვითხოვეთ, რომ გვყავდეს 350 მოკლევადიანი დამკვირვებელი. მათი როლი იქნება, რომ სისტემატურად დააკვირდნენ ხმის მიცემის, კენჭისყრის, ასევე, ხმის დათვლის პროცედურებს მთელს ქვეყანაში", — განაცხადა მან.

საქართველოში თვითმმართველობის არჩევნები 2 ოქტომბერს იქნება. როგორც მმართველმა პარტიამ, ასევე, ოპოზიციური პარტიების ნაწილმა საკუთარი კანდიდატები ქვეყნის მასშტაბით უკვე წარადგინეს. ბოლო პერიოდში დაიწყო საუბარი არჩევნების გადადებაზე. ომბუდსმენი ფიქრობს, რომ ეპიდვითარების გამო უნდა დაიწყოს მსჯელობა არჩევნების გადადებაზე. ლომჯარიამ სპეციალური ბრიფინგი გამართა და განაცხადა, რომ მისი მიმართვის ადრესატი პრემიერმინისტრი ირაკლი ღარიბაშვილია, რადგან მას აქვს უფლება გამოაცხადოს საგანგებო მდგომარეობა. ლომჯარიას განმარტებით, სწორედ საგანგებო მდგომარეობა შეიძლება გახდეს არჩევნების გადადების წინაპირობა. სახალხო დამცველის თქმით, 2020 წლის საპარლამენტო არჩევნებამდე ამ საკითხზე საუბარი დაავადებათა კონტროლისა და საზოგადოებრივი ჯანმრთელობის ცენტრთანაც ჰქონდა, თუმცა წელს ამის საჯაროდ გაცხადება თავად გადაწყვიტა.

ლომჯარიას დაანონსებულ ბრიფინგამდე ერთი საათით ადრე მოულოდნელად ჩაინიშნა ბრიფინგი ქართულ ოცნებაში. მმართველი პარტია არჩევნების გადადებაზე უარს ამბობს. პარტიის ერთ-ერთმა სპიკერმა, მამუკა მდინარაძემ განაცხადა, რომ არ უნდა დააბრალოს, თუმცა უშვებს, რომ ნინო ლომჯარია ნაციონალური მოძრაობის "გარე სპიკერი" და "[მიხეილ] სააკაშვილის დავალების შემსრულებელი" აღმოჩნდეს. პრემიერმინისტრმა ირაკლი ღარიბაშვილმა სახალხო დამცველის იდეას პირდაპირ უწოდა "ნაციონალების შემუშავებულ გეგმა".