ჯანდაცვის მინისტრის მოადგილის, თამარ გაბუნიას განცხადებით, საარჩევნო პროცესში მონაწილე პირებისთვის შარშანდელ წესებს ორი რეკომენდაცია დაემატება: ვაქცინაციისა და სავალდებულო ტესტირების შესახებ.

"უსაფრთხო არჩევნების რეკომენდაციები ჩვენ გასულ წელსაც გვქონდა, წელს რამდენადმე შეიცვალა ეს რეკომენდაციები, იმგვარად, რომ დაემატა ვაქცინაციასთან დაკავშირებული რეკომენდაციები და ჩვენი მხრიდან, ჯანდაცვის სექტორის მხრიდან, ვალდებულება და პასუხისმგებლობა, რომ საარჩევნო პროცესში მონაწილე პირებს ხელი შევუწყოთ ორგანიზებულ აცრებში და მათ არ ჰქონდეთ შეფერხება ამ კუთხით. ასევე დაემატა სავალდებულო ტესტირება პროცესში მონაწილე პირებისთვის კვირაში ერთხელ. ეს არის ორი დამატებითი რეკომენდაცია. სხვა დანარჩენი რეკომენდაციები, რაც აქამდეც იყო, ბუნებრივია, უნდა აღსრულდეს", — აღნიშნა გაბუნიამ.

გაბუნიას განცხადებით არჩევნების ჩატარება მაღალ რისკებს არ უკავშირდება, მაგრამ აუცილებელია იმ რეკომენდაციების დაცვა, რაც სპეციალურად ამ დღისთვის არის შემუშავებული. ჟურნალისტის კითხვაზე, შეიცვალა თუ არა საპარლამენტო არჩევნების შემდეგ ეპიდომოლოგიური ვითარება, მან განაცხადა, რომ შარშან გავრცელება უფრო მეტად ქუჩის აქციებმა გამოიწვია.

სახალხო დამცველმა, ნინო ლომჯარიამ განაცხადა, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

ქართული ოცნება არჩევნების გადადებაზე უარს ამბობს. პარტიის ერთ-ერთმა ლიდერმა, მამუკა მდინარაძემ განაცხადა, რომ ოპოზიციას არჩევნებში მონაწილეობა მაინც მოუწევს.

გაიგეთ მეტი: