14 ნოემბერს ქვეყნის მასშტაბით მოსახლეობისა და სასოფლო-სამეურნეო აღწერა დაიწყო, რომელიც ყოველ 10 წელიწადში ერთხელ ტარდება.

საქართველოს სტატისტიკის ეროვნული სამსახურის ცნობით, პირველი ეტაპი, რომელიც მოსახლეობის თვითრეგისტრაციას გულისხმობს, 23 ნოემბრის ნაცვლად 28 ნოემბერს დასრულდება. მონაცემთა შეგროვების სრული პროცესი 19 დეკემბრის ჩათვლით გაგრძელდება.

"თვითრეგისტრაციის ვადის გახანგრძლივების მიზეზი მოსახლეობის მხრიდან მაღალი აქტივობა და მოთხოვნაა. თვითრეგისტრაციის მეთოდით უკვე ისარგებლა ათეულობით ათასმა მოქალაქემ, პროცესი აქტიურად მიმდინარეობს ეხლაც და მათი რაოდენობა მზარდია. ამიტომ მაღალი საზოგადოებრივი ინტერესიდან გამომდინარე, საქსტატმა მიიღო გადაწყვეტილება, აღწერის ფარგლებში თვითრეგისტრაციის პროცესი კიდევ ხუთ დღით - 28 ნოემბრის ჩათვლით გააგრძელოს" — წერია საქსტატის განცხადებაში.