ფეისბუქმა ანტივაქსერების ასობით ანგარიში წაშალა. ქსელი იმ უცნობ სარეკლამო კომპანიასთან იყო კავშირში, რომლებიც ცნობილ ადამიანებს კორონავირუსის ვაქცინების წინააღმდეგ საუბრისთვის ფულს უხდიდა. ანტივაქსერული კამპანია რუსეთიდან იმართებოდა.

ქსელი ფეისბუქის 65, ხოლო ინსტაგრამის 243 ანგარიშს მოიცავდა. მათი კვალი ინფლუენსერ-მარკეტინგულ სააგენტო Fazze-თან მიდიოდა, რომელიც უცნობი კლიენტისთვის მუშაობდა და ცნობილ ადამიანებს ანტივაქსერული კამპანიების წარმოებისთვის ფულს სთავაზობდა. გასულ თვეში ეს გეგმა ევროპელმა იუთუბერებმა გამოააშკარავეს, რომლებმაც ანტივაქსერულ კამპანიაში ფულის აღებაზე უარი თქვეს.

ქსელი შეცდომაში შემყვანი მოსაზრებების გასავრცელებლად ყალბ ანგარიშებს იყენებდა და ავრცელებდა დაუსაბუთებელ ცნობებს, თითქოს ფაიზერის და ასტრაზენეკას ვაქცინები უსაფრთხო არ იყო. ერთ-ერთი ასეთი დეზინფორმაციის მიხედვით, ასტრაზენეკათი აცრის შემთხვევაში ადამიანი შიმპანზედ გადაიქცეოდა. ამ ანგარიშების სამიზნეები იყო ისეთი ქვეყნები, როგორიცაა ინდოეთი, ლათინური ამერიკა და აშშ-ც კი. ყალბი ანგარიშები ამ ქვეყნების მოქალაქეების აზრზე ზემოქმედებისთვის ფეისბუქსა და ინსტაგრამს იყენებდნენ.

რუსეთი, რომელმაც კორონავირუსის ვაქცინა Sputnik V შექმნა, საკუთარი ვაქცინის პოპულარიზაციას ეწევა, რასაც ექსპერტები მის გეოპოლიტიკურ გეგმებსაც უკავშირებენ. თუმცა, ფეისბუქის წარმომადგენლები დაბეჯითებით ვერ ამბობენ, რომ დეზინფორმაციის კამპანია რუსეთის ამ მოტივაციით აიხსნება.

Fazze-ს ქსელი ასევე უკავშირდებოდა სოციალურ მედიებში სხვადასხვა ცნობილ ადამიანს და მათ ფულს უხდიდა, რომ შეცდომაში შემყვანი ინფორმაცია გაევრცელებინათ ვაქცინებზე. ფეისბუქმა თავისი პლატფორმებიდან კომპანიის ანგარიშებიც წაშალა.

ფეისბუქის უსაფრთხოების პოლიტიკის ხელმძღვანელი, ნათანიელ გლეიჩერი ამბობს, რომ მართალია Fazze-ის პოსტები დიდი პოპულარობით არ გამოირჩეოდა, მაგრამ ესეც გეგმის ნაწილი იყო.

ფეისბუქის მკვლევრები ასევე ამბობენ, რომ მართალია ზოგი ცნობილი ადამიანი Fazze-ის შეთავაზებას დათანხმდა და ვაქცინის საშიშროებაზე პოსტები საკუთარ აუდიტორიას გაუზიარა, მაგრამ მათ მოგვიანებით ეს ინფორმაცია ანგარიშიდან წაშალეს.

ფრანგი იუთუბერ ლეო გრასეს თანხის სანაცვლოდ Fazze-მა ფაიზერის ვაქცინის საშიშროებაზე 45-60-წამიანი ვიდეოების განთავსება სთხოვა ინსტაგრამზე, ტიკტოკსა და იუთუბზე, თუმცა მოსთხოვა, რომ საიდუმლოდ დაეტოვებინა, რომ მასალა დარეკლამებული იყო და მასში ფული გადაუხადეს. ლეო გრასემ შეთავაზება არ მიიღო და მათ შესახებ ინფორმაცია გაასაჯაროვა.

"ძალიან ბევრი შემაშფოთებელი დეტალი იყო ამ შემოთავაზებაში და არ დავთანხმდი", — ამბობს ის.

ლეო გრასე მისი მოსყიდვის მცდელობით გაოცებული იყო.

ფოტო: LÉO GRASSET

ამავე თემაზე: