ბელარუსის პრეზიდენტმა, ალექსანდრე ლუკაშენკომ ჟურნალისტებთან, საზოგადოების წარმომადგენლებთან, ექსპერტებთან და მედია საზოგადოებასთან 8-საათიანი შეხვედრა გამართა, სადაც სხვა საკითხებთან ერთად საქართველოზეც ისაუბრა. ლუკაშენკომ აღნიშნა, რომ საქართველო, უკრაინის მსგავსად, მისი "თავის ტკივილია". საქართველოზე კითხვა პრორუსმა პოლიტიკოსმა, პარტია ნეიტრალური საქართველოს თავმჯდომარე, ქართულ-რუსული მეგობრობის ცენტრის ხელმძღვანელმა ვალერი კვარაცხელიამ დაუსვა.

"საბჭოთა პერიოდში, ბევრჯერ ვიყავი აფხაზეთში, (თუმცა სამხრეთ ოსეთში არ ვყოფილვარ) საქართველოში თბილისის გარდა აფხაზეთში ვიყავი. ქართველები, თეთრი ვოლგა, ლამაზი გოგოები... რუსებს, ბელარუსებსა და უკრაინელებს ყოველთვის შურდათ თქვენი! მე არ ვსაუბრობ მიღწევებზე — ეს იყო აყვავებული ოაზისი. ახლახანს ვნახე რა მოხდა იქ. არ ვიტყვი რატომ: კარგი დამოკიდებულება მაქვს საქართველოს, ქართველების მიმართ. არსებობს როგორც ობიექტური, ასევე, სუბიექტური მიზეზები, მაგრამ დასკვნები ყველაფრისგან უნდა გამოიტანო, სანამ გვიანი არ არის. წითელი ხაზები უკვე გადავლახეთ, მაგრამ ჯერჯერობით კუთხეში არ ვართ. ჩვენ უნდა დავბრუნდეთ, დავსხდეთ ერთ მაგიდასთან და გადავწყვიტოთ რას გავაკეთებთ. უნდა დავიწყოთ ეკონომიკით, რათა ადამიანებმა იგრძნონ, რომ ამას აქვს აზრი", — თქვა მან.

ლუკაშენკო ამბობს, რომ საქართველო "უკვე შორს არის" სხვა პოსტსაბჭოთა ქვეყნებიდან: აქ ახალგაზრდები უფრო ხშირად საუბრობენ ინგლისურად, ვიდრე რუსულად. მან ამის შესახებ უთხრა რუსეთის პრეზიდენტს ვლადიმერ პუტინს და ამაში დარწმუნდა, როდესაც რამდენიმე წლის წინ ის საქართველოს პრეზიდენტ გიორგი მარგველაშვილთან ერთად თბილისის ქუჩებში სეირნობდა.

"მან ვიღაც მოიწვია — ისინი რუსულად არ მელაპარაკებოდნენ, საუბრობდნენ ინგლისურად, მე მათ თარჯიმნის საშუალებით ვეურთიერთობოდი. კატასტროფა! მომავალში კიდევ უფრო უარესი იქნება", — თქვა ლუკაშენკომ.

მან, ასევე, აღნიშნა, რომ საქართველო და სხვა პოსტსაბჭოთა ქვეყნები, ერთმანეთის დაშორებით, ტრადიციულ ბაზრებს კარგავენ. ლუკაშენკომ, აგრეთვე, გაიხსენა, რომ დსთ -ში საქართველოსა და უკრაინის მონაწილეობის დროსაც კი მან საქართველოსა და უკრაინის ყოფილ პრეზიდენტებს მიხეილ სააკაშვილს და პეტრო პოროშენკოს სთხოვა ეს ასოციაცია არ დაეტოვებინათ, მაგრამ არ მოუსმინეს.

შეხვედრაზე, რომელიც რვა საათზე მეტ ხანს გაგრძელდა, ბელარუსის პრეზიდენტმა, ასევე, თქვა, რომ ადვილია გასვლა, მაგრამ უკან დაბრუნება, სხვადასხვა მიზეზის გამო, გაცილებით რთულია. მათ შორის მორალური წესრიგის ჩათვლით.

ლუკაშენკო თვლის, პოსტსაბჭოთა ქვეყნებს დასავლეთში არავინ ელოდება. ის დარწმუნებულია, რომ პოსტსაბჭოთა სივრცეში სახელმწიფოების გაერთიანების საფუძველი ეკონომიკა შეიძლება გახდეს.