ხანგრძლივი ტრადიციის შემდეგ, ინდონეზიის ჯარში ქალებისთვის "ქალწულობის", იგივე ე.წ. "ორი თითის ტესტის" ჩატარებას აკრძალავენ. ამის შესახებ ჯარის ხელმძღვანელმა, გენ ანდიკა პერკასამ კონფერენციის დროს სხვა სამხედრო მაღალჩინოსნებს განუცხადა.

"ამიერიდან აღარ იქნება ისეთი [სამედიცინო] შემოწმება, რომელიც კონკრეტულ მიზანს არ ემსახურება. ზოგიერთი რაღაც [ჯარისთვის] რელევანტური არაა... და მსგავსი სახის ტესტს ვეღარ ჩავატარებთ. ქალებიც ისეთ შემოწმებას გაივლიან, როგორსაც კაცები გადიან", — ამბობს პერკასა.

აქამდე ინდონეზიის ჯარში გაწევრიანების მსურველ ქალებს "ქალწულობის ტესტი" უნდა გაევლოთ, რომლის ფარგლებში მედიკოსები ამოწმებდნენ, ხელუხლებელია თუ არა ქალის საქალწულე აპკი. უარყოფითი პასუხის შემთხვევაში ქალებს ჯარში მიღებაზე უარს ეუბნებოდნენ.

ამიერიდან ჯარისათვის ქალებიც კაცების მსგავს შერჩევის პროცესს გაივლიან, სადაც გადამწყვეტი მათი უნარები და ცოდნა იქნება. გავრცელებული ინფორმაციის მიხედვით, ამ აკრძალვას საჰაერო და საზღვაო ძალებიც დაემორჩილებიან.

ადამიანის უფლებათა საერთაშორისო ორგანიზაციები ინდონეზიის გადაწყვეტილებას მხარს უჭერენ. ორგანიზაცია Human Rights Watch-ის მიხედვით, ცვლილება იქნება აღსასრული "ძალადობრივი, არამეცნიერული და დისკრიმინაციული 'ქალწულობის ტესტისა', რომელსაც ინდონეზიის სამხედრო ძალების ყველა დანაყოფი ათწლეულობის განმავლობაში ახალწვეულ ქალებს უტარებდა".

ტესტის გაუქმებას მხარს უჭერენ ინდონეზიელი ქალებიც.

"ამ ტესტის გაუქმება დიდი გამარჯვება იქნება, თუნდაც მხოლოდ ჯარისთვის იმიტომ, რომ აღნიშნული პროცედურა ქალებისთვის დამამცირებელია", — ამბობს ქალი, რომელიც 23 წლის წინ სამხედრო ძალებში სწორედ აღნიშნული ტესტის პასუხის გამო არ მიიღეს.

მსოფლიო ჯანდაცვის ორგანიზაციასა (WHO) და გაერთიანებულ ერებზე დაყრდნობით, "ქალწულობის ტესტი" ადამიანის უფლებების შემლახველია. WHO-ს განცხადებით, პროცედურა, რომელიც მინიმუმ 20 ქვეყანაში ტარდება, დისკრიმინაციულის გარდა, უსარგებლოცაა, რადგან აპკი შესაძლოა მრავალი მიზეზით გაიხეს, იქნება ეს ტამპონების გამოყენება თუ ვარჯიში.

ამავე თემაზე: