ქართული ოცნების გენერალური მდივანი, კახა კალაძე ფიქრობს, რომ სახელმწიფო უსაფრთხოების სამსახური უნდა უსმენდეს იმას, ვისი მოსმენის საჭიროებაც არის კანონის ფარგლებში.

"შესაბამისი სამსახური, უსაფრთხოების სამსახური უნდა უსმენდეს იმას, ვისი [მოსმენის] საჭიროებაც არის კანონის და კონსტიტუციის ფარგლებში", — განაცხადა კახა კალაძემ.

ჟურნალისტის კითხვას, აქვს თუ არა განცდა, რომ მასაც უსმენენ, კალაძემ ასე უპასუხა:

"მე არა მაქვს ამის განცდა, რომ მე მისმენენ. შეიძლება ვიღაცას ჰქონდეს, მე არ მაქვს".

2 აგვისტოს, მთავარი არხის დირექტორმა, ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსენებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

გაიგე მეტი: