სტრატეგია აღმაშენებლის ლიდერი, გიორგი ვაშაძე აცხადებს, რომ მოქალაქეების უკანონოდ მოსმენა ამაზრზენი საქციელია. დეპუტატი ამბობს, რომ სუს პირად საუბრებსაც უსმენს, ამიტომ ოჯახის წევრებსაც კი არ ესაუბრება ტელეფონით და ცდილობს სხვა აპლიკაციები გამოიყენოს.

"აპლიკაციების ოთხმოცდაათი პროცენტი ყველას, თქვენც მათ შორის და ვინც ამ დარბაზში ზის ქართული ოცნების მხრიდან, აქვს დაყენებული იმისთვის, რომ ხან ერთით ილაპარაკოს, ხან მეორეთი, ხან მესამეთი, ხან მეოთხეთი, რომ არ მოუსმინოს სუს­-მა. არ ვიცით ეს? ეს ხომ რეალობაა. აი, ეს უნდა დავამთავროთ და ასეთ ქვეყანაში არ გვინდა ცხოვრება. ეს არის უბედურება, როცა ასე ვცხოვრობთ. [...]

ეს არის ამაზრზენი, უბედურება, რომელიც ამ ქვეყანაში არსებობს, რომ ჩემი უფროსი ბიჭი შუათანას ან უმცროსს რომ ეჩხუბება და უმცროსი რომ შეიძლება, მირეკავდეს, ისიც კი ვოთსაპით მირეკავს უკვე. აი, ეს არის უბედურება, მეგობრებო. [...] არ არის ეს ნორმალური და ეს არის რეალობა", — აცხადებს ვაშაძე.

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ. თუმცა, მეორე დღეს უწყებამ განცხადება გაავრცელა, სადაც აღნიშნა, რომ ჩანაწერების გასაჯაროება დეზინფორმაციული კამპანიაა და მტრულად განწყობილი ქვეყნის ინტერესებში შედის

ამასთან, საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.