საჭიროების შემთხვევაში, სოფლის მოსახლეობას აცრისთვის მობილური ამბულატორიით შეეძლება სარგებლობა. ამ დროისთვის, ხელმისაწვდომი იქნება სინოფარმი და სინოვაკი. ამის შესახებ იმუნიზაციის საბჭოს სხდომის შემდეგ ჯანდაცვის მინისტრის მოადგილემ, თამარ გაბუნიამ განაცხადა. მისივე თქმით, რაინული ჯანდაცვის ცენტრებს სოფლის მოსახლეობის ვაქცინაცია დაევალება.

"მთავრობის დადგენილებით, რაიონულ ცენტრების, ცენტრის დაწესებულებების, რომლებიც 66 რაიონში ფუნქციონირებს და მოსახლეობას ემსახურება სპეციალიზებული სერვისებით, პასუხისმგებლობად განისაზღვრება, რომ მოიცვან სოფლის მოსახლეობა ვაქცინაციით. მოცვა განხორციელდება ოჯახის ექიმების ჩართულობით, სოფლის ამბულატორიის დონეზე, ასევე, შესაძლებელია, სადაც საჭრო იქნება, გასვლითი მობილური ამბულატორიების გამოყენება, რაც მოგვცემს საშუალებას, რომ სოფლის მოსახლეობაც აიცრას. აქ საუბარია სინოფარმით და სინოვაკით აცრების გაფართოებაზე. ფაიზერი ჯერჯერობით მობილური ბრიგადის ფარგლებში განიხილება მხოლოდ იმ შემთხვევაში, როცა საუბარია ქრონიკულ ან ბინაზე მწოლიარე პაციენტზე, რომელთანაც ბრიგადა გადის რეანომობილის თანხლებით და ბინაზე ხდება აცრა. ეს პროცესი დაწყებულია თბილისში და კიდევ უფრო სწრაფად წავა სხვა რეგიონებშიც", — განაცხადა გაბუნიამ.

დღესვე, ცნობილი გახდა, რომ ფაიზერით ვაქცინაცია, ჰოსპიტალურის გარდა, ამბულატორიულ დაწესებულებებშიც ჩატარდება. თამარ გაბუნიას თქმით, ფაიზერით ჩატარებული ვაქცინაციის რაოდენობა და გამოცდილება აჩვენებს, რომ ვაქცინაციის შემდეგ განსაკუთრებულად სწრაფად დაფიქსირებული გვერდითი რეაქციები არის მინიმალური.

საბჭოს სხდომის შემდეგ საზოგადოებრივი ჯანდაცვის ცენტრის ხელმძღვანელმა, ამირან გამყრელიძემ განაცხადა, რომ თუ თვეში მილიონი აცრა ჩატარდება, პანდემიის ყველა მაჩვენებელს სრულად გადავლახავთ. თუმცა, სამიზნეს ქვეყნის მასშტაბით 800 ათასი აცრა წარმოადგენს და 600 ათასის შემთხვევაშიც მიზნის მიღწევა შესაძლებელი იქნება.