რეგიონული სატრანსპორტო კომუნიკაციების განბლოკვის საკითხზე აზერბაიჯანის, რუსეთისა და სომხეთის ვიცე-პრემიერების სამმხრივი სამუშაო ჯგუფი ნდობის პრობლემების გამო არ ფუნქციონირებს.

როგორც სომხური მედია იტყობინება, ამის შესახებ სომხეთის პრემიერმინისტრმა ნიკოლ ფაშინიანმა პრესკონფერენციაზე განაცხადა.

ფაშინიანმა ხაზგასმით აღნიშნა, რომ ზემოაღნიშნული სამუშაო ჯგუფი "გარკვეული ნდობის ნაკლებობის" გამო არ ფუნქციონირებს.

რუსული მხარის განცხადებით, რუსეთის, სომხეთისა და აზერბაიჯანის ვიცე-პრემიერების დონეზე სამმხრივი კომისიის მუშაობა არ შეჩერებულა, თუმცა ამ ეტაპზე ის "მიძინებულ" მდგომარეობაშია. ამის შესახებ ჟურნალისტებს რუსეთის ვიცე-პრემიერმა ალექსეი ოვერჩუკმა განუცხადა, როდესაც უპასუხა კითხვას, დაიშლებოდა თუ არა სამმხრივი სამუშაო ჯგუფი იმის გათვალისწინებით, რომ სომხეთმა და აზერბაიჯანმა ერთმანეთთან პირდაპირი კომუნიკაცია დაიწყეს.