პარტია გახარია საქართველოსთვის ლიდერმა, ბრიუსელში "ევროსკოპთან" საუბრისას განაცხადა, რომ საქართველოში დაბრუნებას აპირებს, მაგრამ "ასე ოცნებას ნამდვილად არ ჩაბარდება".

"ოცნება დღეს გაფორმდა და ჩამოყალიბდა ანტიეროვნულ, ანტისახელმწიფოებრივ ძალად, რომელსაც ჩვენი სამშობლოს, საქართველოს მომავალი ფეხებზე კიდია. ისინი ახლა ზრუნავენ თავიანთი მოპარული ფულის გადასარჩენად.

რა თქმა [საქართველოში დაბრუნებას] ვაპირებ. მე ვიზიტები ჯერჯერობით კიდევ დაგეგმილი მაქვს. რთულია კონკრეტულად თქმა, დღევანდელი ხელისუფლების უგუნურება რა სახის ზღვრებს გადალახავს", — განაცხადა გიორგი გახარიამ.

ჟურნალისტის კითხვას — "ციხისთვის თუ ხარ მზად?", გახარიამ უპასუხა, რომ ის ბრძოლისთვისაა მზად.

"მე ბრძოლისთვის ვარ მზად ნებისმიერი ფორმით და ნებისმიერ ადგილას. იმისთვისაც ვარ მზად, რომ ასე "ოცნებას" ნამდვილად არ ჩავბარდები. ყველამ ჩვენი საქმე უნდა გავაკეთოთ და ვიბრძოლოთ იქ, სადაც უფრო ეფექტურები ვართ. თუ აქ ვარ ეფექტური ვიბრძოლებ აქ, თუ იქ ვარ ეფექტური ვიბრძოლებ იქ, თუ ციხეში ვარ ეფექტური, ვიბრძოლებ ციხეში", — განაცხადა გიორგი გახარიამ.

შეგახსენებთ, რომ გიორგი გახარიას ე.წ. ჩორჩანას ეპიზოდთან დაკავშირებით განმეორებით გამოსაკითხად 23 ივნისს დაიბარეს. უცხოეთში ვიზიტის გამო გახარიამ კომისიას ჩართვა ონლაინ-ფორმატში შესთავაზა, რაზეც წულუკიანის კომისიამ უარი უთხრა და სხდომაზე განმეორებით 2 ივლისს დაიბარეს, შემდეგ კი მის ონლაინ-რეჟიმში ჩართვასაც დასთანხმდნენ. საბოლოოდ გახარია ონლაინ 2 ივლისს გამოიკითხა. ამ დროისთვის უცნობია, როდის დაბრუნდება საქართველოში.