"გიორგის მდგომარეობა სტაბილურია, დადებითი დინამიკი აქვს, თუმცა ჯერ კიდევ ეტლით გადაადგილდება, ვინაიდან კოორდინაციის პრობლემა აქვს," — ამის შესახებ გიორგი ბაჩიაშვილის ადვოკატმა დავით ჯანდიერმა განაცხადა და აღნიშნა, რომ დღესვე მიმართავენ პენიტენციურ სამსახურს, რომ ბაჩიაშვილი გამოჯანმრთელებისთანავე რუსთავის ციხეში დააბრუნონ.

"გიორგის მდგომარეობა სტაბილურია, დადებითი დინამიკი აქვს, თუმცა ეტლით გადაადგილდება, ვინაიდან კოორდინაციის პრობლემა აქვს. ჯანმრთელობის მდგომარეობა უკეთესობისკენ მიდის. ველოდებით, რომ რამდენიმე დღეში მისი ჯანმრთელობის მდგომარეობა საგრძნობლად გაუმჯობესდება. ის ექიმის მეთვალყურეობის ქვეშ რჩება.

დღეს ჩვენ მივმართავთ პენიტენციურ სამსახურს და მოვითხოვთ ყველა სრულყოფილი კვლევა ჩაუტარდეს, რაც საჭირო იქნება, რათა მისი მდგომარეობა შეფასდეს, ასევე, თუ ექიმების რეკომენდაცია იქნება სხვა დამატებით სამედიცინო სერვისებზე, მისთვის მიწოდებული იყოს. ასევე, დღესვე მივმართავთ პენიტენციურ სამსახურს, რომ მას შემდეგ, რაც ის გამოჯანმრთელდება, დაბრუნდეს რუსთავის #12 საპატიმროში. მიუხედავად იმისა, რომ ნებისმიერ დაწესებულებაში მისი უსაფრთხოება და ჯანმრთელობა რისკის ქვეშ არის, ეს რისკი განსაკუთრებით მომატებულია იმავე დაწესებულებაში, სადაც ინციდენტს ჰქონდა ადგილი. ეს ინციდენტი კი შეიძლება შეფასდეს წამებად და არაადამიანურ მოპყრობად. მნიშვნელოვანია რისკების მინიმალიზაცია მოხდეს და ამით არის განპირობებული ეს მოთხოვნაც.

ასევე დავაყენებთ მოთხოვნას, რომ საკანში მარტო იმყოფებოდეს, გასაგებია, რომ მარტო ყოფნა სხვა ტიპის პრობლემებს წარმოშობს პატიმრისთვის, თუმცა, რისკების და მომხდარის გათვალისწინებით სჯობს მარტო იმყოფებოდეს მუდმივი ვიდეოკონტროლის დაკვირვების ქვეშ," — განაცხადა ჯანდიერმა.

14 ივლისს გავრცელდა ინფორმაცია, რომ თანაინვესტირების ფონდის ყოფილი ხელმძღვანელი გიორგი ბაჩიაშვილი გლდანის ციხეში სცემეს. NEWS.On.ge-ს თავდაპირველად ბაჩიაშვილის ადვოკატმა, დავით ჯანდიერმა დაუდასტურა, რომ ის ნაცემი იყო. როგორც მან განგვიცხადა, ბაჩიაშვილი ციხის სამკურნალო დაწესებულებაში იყო მოთავსებული. კლინიკა "ვივამედის" კლინიკური დირექტორის, ზურაბ ჩხაიძის განცხადებით, ბაჩიაშვილი პარასკევს, 11 ივლისს, კლინიკაში სხეულის სხვადასხვა დაზიანებით შეიყვანეს. მისი თქმით, ბაჩიაშვილს ასევე აღენიშნებოდა ღია ჭრილობები თავის არეში. ჩხაიძის ცნობით, ბაჩიაშვილი კლინიკაში გადაყვანიდან რამდენიმე საათში უკან, ციხეში დააბრუნეს.

თანაინვესტირების ფონდის ყოფილი ხელმძღვანელი წერილში წერს, რომ 8 ივლისს მე-8 დაწესებულების ხელმძღვანელმა, დავით გოგობერიშვილმა მოინახულა და ურჩია, რომ "ივანიშვილისთვის მთელი მისი საბანკო ანგარიშები, კრიპტოვალუტების ბრუნვები და ანგარიშის მისამართები გაეხსნა". მას შემდეგ რაც ბაჩიაშვილისგან უარი მიიღო, დაემუქრა. 11 ივლისს კი ის საკანში უცნობმა პირმა სცემა.

გაიგეთ მეტი:

• "მკაფიო წამება სახელმწიფო ზედამხედველობის ქვეშ" — რობერტ ამსტერდამი გიორგი ბაჩიაშვილის ცემაზე
• შალვა პაპუაშვილი: ეს ადამიანი [გიორგი ბაჩიაშვილი] არის ჩვეულებრივი დადასტურებული ოსტაპ ბენდერი
• რობერტ ამსტერდამის თქმით, ბაჩიაშვილის ციხეში ცემა, წამების მცდელობასთან ერთად, ქონების გამოძალვის მცდელობაცაა
• გიორგი ბაჩიაშვილის ადვოკატი: დამოუკიდებლად გადაადგილება უჭირს. ტვინის შერყევა და რამდენიმე ადგილზე ნაკერები აქვს
• Amnesty international: "აუცილებელია [გიორგი ბაჩიაშვილის] განცხადებების დამოუკიდებელი გამოძიება"
• სალომე ზურაბიშვილი: სწორედ ამ უსასტიკესი მოქმედებებისა და ციხეებში უსამართლო მოქცევის გამო დამთავრდა წინა რეჟიმი".
• "მთელი მართლმსაჯულების სისტემა პირადი შურისძიების ინსტრუმენტია ბიძინა ივანიშვილის ხელში" — "ფედერალისტები" გიორგი ბაჩიაშვილის ცემას ეხმაურებიან
• "იყო სხეულის დაზიანებები სხვადასხვა ადგილზე და ღია ჭრილობები თავის არეში" — ზურაბ ჩხაიძე ბაჩიაშვილზე
• უკიდურესად მნიშვნელოვანია, გამოძიების ფარგლებში დადგინდეს ძალადობასთან დაკავშირებული ყველა რელევანტური გარემოება — ლევან იოსელიანი ბაჩიაშვილის ცემის ფაქტზე
• პენიტენციური სამსახურის განცხადებით, ბაჩიაშვილის საკანში დაფიქსირდა მსჯავრდადებულთა შორის ინციდენტი, რის შედეგადაც "მას აღენიშნებოდა ზედაპირული დაზიანებები"
• "ჭიქა გადამაფშვნა", "გონება დავკარგე", "კედელზე მიმარტყმევინა თავი" — ბაჩიაშვილი ყვება როგორ დაემუქრნენ და გაუსწორდნენ ციხეში
• გლდანის ციხეში გიორგი ბაჩიაშვილს სცემეს — ის ციხის კლინიკაშია გადაყვანილი