ჟურნალისტებმა 5 ივლისის ძალადობრივი კონტრაქციის ორგანიზატორების დასჯის მოთხოვნით, შსს-თან აქცია გამართეს. მათ TV პირველის გარდაცვლილი ოპერატორის, ლექსო ლაშქარავს ფოტოები ეჭირათ და აცხადებდნენ, რომ ხელისუფლებამ მომხდარზე პასუხისმგებლობა უნდა აიღოს.

ლექსო ლაშქარავა ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და შემდეგ სახლში გაეწერა, 11 ივლისს კი საკუთარმა დედამ გარდაცვლილი იპოვა.

აქციის პარალელურად სამინისტროსთან პოლიციელების საკმაოდ დიდი რაოდენობა იყო მობილიზებულები — მათ შესასვლელთან ორ რიგად კორდონი ჰქონდათ გაკეთებული.

ჟურნალისტმა დავით ქაშიაშვილმა შსს-ს მიერ ლაშქარავას გადაადგილების მარშრუტის ამსახველი ვიდეომასალის გავრცელებაზე საუბრისას აზერბაიჯანელი ჟურნალისტის, აფგან მუხთარლის საქმე გაიხსენა.

"თუკი დავაკვირდებით და უბრალოდ შევადარებთ კონტრასტისთვის ორ ამბავს — აფგან მუხთარლი გაიტაცეს დედაქალაქის ცენტრიდან და აზერბაიჯანის საზღვრამდე ისე ატარეს, რომ აღმოჩნდა, არცერთი კამერა არ მუშაობდა, დასჭირდათ ლექსოს მარგინალიზაცია და ყველა კამერა მუშაობდა და მთლად ნარკოტიკების გადამყიდველის სახლთან, თურმე, კამერა ყოფილა. ეს ყველაფერი ძალიან გულდასაწყვეტია, როდესაც შენს ქვეყანაში ხდება და შენც რომ რამე დაგემართოს, შენზეც უცბად მოამზადებენ რაღაც მხატვრულ ვიდეორგოლს", — უთხრა ON.ge-ს ჟურნალისტმა დავით ქაშიაშვილმა.

ქაშიაშვილი დარწმუნებულია, რომ ჟურნალისტების პროტესტს შედეგი ექნება.

"ქართულ მედიას ძალიან ბევრი მონსტრი გადაუყლაპია და ცხადია, ამ მონსტრსაც მოერევა. ქართულ მედიას მართლა ვერაფერს დააკლებენ იმიტომ, რომ 15 წელია, ქუჩის რეპორტიორი ვარ და ჩემზე უკეთესად არავინ იცის, რა შეუძლია მედიას. ცხადია, შედეგს გამოიღებს იმიტომ, რომ ასეთ შედარებას გავაკეთებ — რაღაც ხომ ყარს და რაც ყარს, ის უნდა დალპეს. გამორიცხულია, რაც აყროლდა, იმან ბუნებრივი სურვილი დაიბრუნოს", — ამბობს ქაშიაშვილი.

აქციაზე შეკრებილი ჟურნალისტებს ხელისუფლებასთან ერთი კითხვა აქვთ — რატომ არ/ვერ დაიცვა ხელისუფლებამ მედია.

"მთავარი კითხვა არის შემდეგი — რატომ ვერ დაგვიცვა ჩვენ ხელისუფლებამ, მთავრობამ. თუ ვერ დაგვიცვა ხელისუფლებამ, მაშინ პასუხისმგებლობა უნდა აიღონ კონკრეტულმა პირებმა. პასუხისმგებლობის აღება კი იმაში მდგომარეობს, რომ უნდა წავიდნენ თანამდებობიდან, პირველ რიგში, ირაკლი ღარიბაშვილი, რომელიც არის ძალადობის წამახალისებელი და ნომერ პირველი ჰომოფობი და ასევე, ძალოვანი უწყების ხელმძღვანელი, ვახტანგ გომელაური", — ამბობს ჟურნალისტი გიორგი კიკაბიძე.

მიუხედავად იმისა, რომ დღეს მედიის აქციას სამინისტროდან არავინ გამოხმაურებია, ჟურნალისტები ამბობენ, რომ ხელისუფლებას მაინც მოუწევს პასუხისგება.

აქციის დასასრულს ჟურნალისტებმა ფოტოები ტროტუარზე დააწყვეს, სადაც პოლიციას კორდონი ჰქონდა.