12 ივლისს წინა დღით დაწყებულმა საპროტესტო ტალღამ გადმოინაცვლა და რუსთაველზე გამართულ აქციაზე 5 ივლისს ნაცემი TV პირველის ოპერატორის გარდაცვალების გამო მთავრობას პასუხისმგებლობის აღება ისევ მოითხოვეს.

მათ შორის იყო მსახიობი ნანკა კალატოზიშვილი, რომელიც სიტყვით საჯაროდ გამოვიდა და ბოლო დღეებში განვითარებულ ძალადობრივ შემთხვევებზე გამოხატა გულისტკივილი:

"მართალი რომ გითხრათ, არ ვიცი, რამდენჯერ ვიტირე, ძალიან ბევრჯერ ვიტირე: ვტიროდი, ვჩერდებოდი, ვტიროდი, ვჩერდებოდი. ვტიროდი ლექსოს; ვტიროდი ქვეყანას, სადაც ვზრდი ჩემს შვილს; ვტიროდი ადამიანებს, რომლებიც ვიხრჩობით ამ ზიზღში; ვტიროდი ადამიანებს, რომლებსაც ყველაფერზე აქვთ "მაგრამ"; ვტიროდი იმიტომ, რომ რამდენსაც გავაბედინებთ, იმდენს გაგვიბედავენ, ყოველთვის ასე იყო და იქნება. ჰოდა, არ ვიცი, რა გითხრათ, იმდენად გაბრაზებული ვარ, რომ ისევ მიჭირს ემოციების გაკონტროლება. ჰოდა, რა გითხრათ ადამიანებო, რა ვიცი, იჯექით სახლში, იჯექით სახლში და დაარქვით ამას ცხოვრება, იჯექით და გეშინოდეთ საკუთარი ოჯახის წევრების გარეთ გაშვება; ფიქრი შვილებზე, თუ რა აცვიათ, როგორ იქცევიან, რას აკეთებენ; იჯექით კი, კარგად იჯექით. ან ამოიღეთ ხმა და ერთ დღეში ისე დაიღალეთ, როგორც აფასებთ საკუთარ სიცოცხლეს. ესე ვაფასებთ ჩვენს ცხოვრებას? ესეთია ჩვენი ცხოვრება? ერთ დღეში ვიღლებით, ვიცლებით, ვხმაურობთ და ვიშლებით?", — განაცხადა მან.

კალატოზიშვილი შინაგან საქმეთა სამინისტროს განცხადებასაც გამოეხმაურა, რომ შუალედური ექსპერტიზის მიხედვით, ლექსო ლაშქარავა, შესაძლოა, ზედოზირებით გარდაიცვალა.

"5 ივლისს რაც მოხდა, ვინმეს დაძახება საჭირო იყო, გარეთ რომ გამოსულიყავით? საჭირო იყო, რომ თქვათ, "სოლიდარულები ვართ და მხარს ვუჭერთ ჟურნალისტებს"? მხარს ვუჭერთ ჟურნალისტებს და იმიტომ ვდგავართ აქ? არა, მე მხარს ვუჭერ ჩემს ქვეყანას, ჩემს თავს, ყველა ადამიანს, ჩემი შვილის მომავალს, რომელიც არ მინდა, რომ ასეთი იყოს. და ძალიან, ძალიან ვბრაზდები, რასაც აკეთებენ ლექსოზე. ლექსოს შვილს მინდა ვუთხრა ერთი რამ: იცი, რატომ აშავებენ მამაშენს? იმიტომ, რომ მართალია, იმიტომ, რომ მართლები ვართ და ზუსტად ამიტომ აშავებენ ესე შენს მამას. ისტორიას ვერ მოატყუებ, ყველაფერი იწერება, ყველაფერი ფიქსირდება, ზუსტად აი, ამ ჟურნალისტების დამსახურებით", — თქვა ნანკა კალატოზიშვილმა.

5 ივლისის ძალადობრივ კონტრაქციაზე ჰომოფობიური ჯგუფების მიერ ნაცემი TV პირველის ოპერატორის გარდაცვალების შემდეგ მედიამ საპროტესტო აქცია გამართა და ღარიბაშვილის გადადგომა მოითხოვა, რასაც საზოგადოების დიდი ნაწილიც შეუერთდა. საპასუხოდ ღარიბაშვილმა ჟურნალისტებზე ძალადობა ნაციონალურ მოძრაობას დააბრალა.

იმ ათობით ადამიანიდან, რომლებიც მოძრაობა სირცხვილიას ოფისში შეჭრას ცდილობდნენ და TV პირველის გადამღებ ჯგუფს თავს დაესხნენ, ჯერჯერობით მხოლოდ ორია დაკავებული. აკაკი ნაკაშიძისა და თორნიკე დავლაშელიძის სასამართლო პროცესი 9 ივლისს გაიმართა და მათ აღკვეთის ღონისძიების სახით პატიმრობა შეეფარდათ. დაცვის მხარე ითხოვდა მათ გათავისუფლებას 2 000-2 000 ლარიანი გირაოთი.

პროკურატურამ ნაკაშიძესა და დავლაშელიძეს, ასევე მთავარი არხის გადამღებ ჯგუფზე თავდასხმის ბრალდებით დაკავებულებს, თემურ ხარაულსა და ილია ქებაძეს ბრალდება საქართველოს სისხლის სამართლის კოდექსის 154-ე მუხლის მეორე ნაწილით (ჟურნალისტისათვის პროფესიულ საქმიანობაში უკანონოდ ხელის შეშლა, ჩადენილი ძალადობის მუქარით), 156-ე მუხლის მე-2 ნაწილის ა ქვეპუნქტით (ადამიანის დევნა პროფესიულ მოღვაწეობასთან დაკავშირებით, ჩადენილი ძალადობით) და 225-ე მუხლის მეორე ნაწილით (სექსუალური ორიენტაციისა და გენდერული იდენტობის ნიშნით შეუწყნარებლობის მოტივით ჯგუფურ ძალადობაში მონაწილეობა) წარუდგინა. ბრალის დამტკიცების შემთხვევაში მათ 4 წლიდან 6 წლამდე პატიმრობა ემუქრებათ.

შსს-მ 12 ივლისს გაავრცელა განცხადება, რომ ლაშქარავას ცემისთვის კიდევ 1 პირი დააკავეს. მათივე ინფორმაციით, 5 ივლისს მედიის წარმომადგენლების მიმართ განხორციელებული ძალადობის ფაქტებზე დაწყებული გამოძიების ფარგლებში სამართალდამცველებმა სულ 20 პირი დააკავეს, მათ შორის 5 — TV პირველის გადამღებ ჯგუფზე ფიზიკური და სიტყვიერი შეურაცხყოფისთვის.

აღსანიშნავია, რომ ამ დრომდე დაკავებულები არ არიან ძალადობრივი აქციის ორგანიზატორები.