შვეიცარიის ქალაქ ბაზელში ევროვიზიის სიმღერის კონკურსმა სტარტი აიღო. 13 მაისს ევროფესტივალის პირველი ნახევარფინალური ტური გაიმართა. შოუს ნაწილი იყო სელინ დიონის ვიდეომიმართვაც ევროვიზიის მაყურებლისადმი.

ლეგენდარულმა კანადელმა მომღერალმა შვეიცარიას 1988 წლის ევროვიზიაზე გამარჯვება მოუტანა, სიმღერით Ne Partez Pas Sans Moi. მას შემდეგ, რაც ქვეყანამ გასულ წელს კონკურსზე კიდევ ერთხელ გაიმარჯვა და მასპინძლობის უფლება მოიპოვა, აქტიურად განიხილებოდა, ვიხილავდით თუ არა დიონს წლევანდელ ევროვიზიაზე. ეს კი, პოპვარსკვლავის ჯანმრთელობის მდგომარეობის გათვალისწინებით, ნაკლებსავარაუდო იყო.

"ახლა ბაზელში თქვენ გვერდით ყოფნაზე მეტად არაფერი არ მინდა", — მიმართა ვიდეოთი სელინმა ევროვიზიის მაყურებელს, — "შვეიცარიას ჩემს გულში ყოველთვის განსაკუთრებული ადგილი ეკავება. ამ ქვეყანამ ჩემი ირწმუნა და მომცა შესაძლებლობა, რაღაც არაჩვეულებრივის ნაწილი გავმხდარიყავი. როცა შვეიცარიის სახელით 1988 წლის ევროვიზიაზე გავიმარჯვე, ამან ჩემი ცხოვრება შეცვალა და მადლიერი ვარ ყველა იმ ადამიანისა, რომელიც მხარს მიჭერდა. ახლა, 37 წლის შემდეგ, საოცრად ამაღელვებელია იმის ხილვა, რომ შვეიცარიამ ისევ გაიმარჯვა და კიდევ ერთხელ მასპინძლობს ამ შესანიშნავ კონკურსს. შვეიცარიელ ხალხს სიყვარულისთვის მადლობას ვუხდი. ეს საღამო თქვენია და, ვიმედოვნებ, ჩემნაირად ამაყობთ.

"მუსიკა გვაერთიანებს და არა მხოლოდ ამ საღამოს, ამ შესანიშნავ მომენტში. როცა გვჭირდება, ის გვაძლევს ძალას, გვიჭერს მხარს და გვიწევს კომპანიონობას. ევროპას და მთელ მსოფლიოს გულში გიხუტებთ. მიყვარხართ".

ვიდეომიმართვა წინ უძღოდა პერფორმანსს: შარშანდელი ევროვიზიის ოთხმა მონაწილემ ერთად შეასრულა სიმღერა, რომლითაც სელინმა კონკურსი მოიგო.

სელინ დიონი ერთადერთი მსოფლიო ვარსკვლავი როდია, რომელიც ევროვიზიაზე მონაწილეობდა. სხვადასხვა დროს, კონკურსის სცენაზე იდგნენ ისეთი ლეგენდარული შემსრულებლები, როგორებიც არიან ტოტო კუტუნიო, ლარა ფაბიანი, ბონი ტაილერი, ხულიო იგლესიასი და ABBA.

2025 წლის ევროვიზია კი გრძელდება. რიგით 69-ე ევროფესტივალზე საქართველოს მარიამ შენგელია წარადგენს, სიმღერით Freedom. ქართველი მომღერალი მაყურებლის წინაშე 15 მაისს, მეორე ნახევარფინალურ ტურში წარდგება და ფინალის საგზურის მოპოვებას შეეცდება.

ევროვიზიის სიმღერის კონკურსის გრანდიოზული ფინალი 17 მაისს გაიმართება.

ასევე იხილეთ: