ფრაქცია ნაციონალური მოძრაობა — გაერთიანებული ოპოზიცია ცესკოს თავმჯდომარეობის პოსტზე არც გიორგი კალანდარიშვილის და არც გიორგი სანტურიანის კანდიდატურას მხარს არ დაუჭერს. ამის შესახებ განცხადება დღეს პარლამენტში საგანგებოდ გამართულ ბრიფინგზე ენმ-ის წარმომადგენელმა, აკაკი მინაშვილმა გააკეთა.

"წლებია, ეს ადამიანები არიან ცესკოს თანამშრომლები, არიან ჟვანიას გუნდის, ანუ ქართული ოცნების გუნდის წარმომადგენლები და ატარებენ იმ გაყალბების პოლიტიკას, რაც წლების განმავლობაში ხდებოდა", — აცხადებს მინაშვილი და დასძენს, რომ ამის გამო, ვერც ერთი კანდიდატი მათი ფრაქციის ნდობას ვერ მოიპოვებს.

ის აქცენტს აკეთებს იმაზე, რომ ამ პოზიციაზე არიან ასევე ავტორიტეტული, მიუკერძოებელი არასამთავრობო ორგანიზაციები.

"მათ მხარი არ დაუჭირეს ამ კანდიდატურებს და გამოთქვეს ეჭვი, რომ კომისიის დანარჩენი წევრები წინასწარ იყვნენ შეთანხმებული ამასთან დაკავშირებით", — ამბობს მინაშვილი.

მისი თქმით, ოპოზიციას ჰქონდა მოლოდინი, რომ ქართული ოცნება საარჩევნო კოდექსში შეტანილ ცვლილებებს "გამოიყენებდა ფიქციისთვის, რეფორმის იმიტაციისთვის" და ეს დაადასტურა, როგორც კომისიის შექმნის ვადებმა და შემადგენლობამ, ასევე შედეგებმა.

"ამ ფაქტმა კიდევ ერთხელ დაადასტურა, რომ მანამ, სანამ ხელისუფლებაშია ქართული ოცნება, საქართველოში ვერ გატარდება ჩვენი ქვეყნის და ჩვენი მოქალაქეებისთვის საჭირო ცვლილებები იმიტომ, რომ ამ ხელისუფლებას ამის ნება არ გააჩნია", — ამბობს ის.

ცესკოს თავმჯდომარეობის და ცესკოს ორ ვაკანტურ პოზიციაზე 2-დღიანი გასაუბრებები გუშინ გვიან ღამით დასრულდა. კომისიამ ცესკოს თავმჯდომარეობაზე ორი კანდიდატი — გიორგი კალანდარიშვილი და გიორგი სანტურიანი, ხოლო წევრობის ხუთი კანდიდატი — ანა მიქელაძე, გია ცაცაშვილი, ლელა ტალიური, მაია ზარიძე და თამარ სართანია, შეარჩია.

პრეზიდენტს წარდგენილი კანდიდატების განხილვისთვის 3 დღე აქვს, რის შემდეგაც კანდიდატთა საბოლოო ვერსიას საკანონმდებლო ორგანოს წარუდგენს. თუ ახალ თავმჯდომარეს დეპუტატების 100 ხმა არ ექნება, სამი მცდელობის შემდეგ ის უბრალო უმრავლესობით მხოლოდ 6 თვით დაინიშნება.

იხილე მეტი: