საქსტატის წინასწარი შეფასებით, მიმდინარე წლის მაისში, წინა წლის შესაბამის პერიოდთან შედარებით, საქართველოს ეკონომიკა 25,8%-ით გაიზარდა, ხოლო 2021 წლის პირველი ხუთი თვის ზრდის საშუალო მაჩვენებელი 11,5% იყო.

ფოტო: საქსტატი

როგორც ცნობილია, ზრდის მსგავსი მონაცემი მნიშვნელოვნად გამოწვეულია ე.წ საბაზისო ეფექტით, რადგან მიმდინარე წლის მაჩვენებელი 2020 წლის მძიმე ლოქდაუნის პერიოდს შედარდა — შეგახსენებთ, რომ გასული წლის მაისში საქართველოს ეკონომიკა 13,5%-ით შემცირდა. თუმცა, აქვე უნდა აღინიშნოს, რომ მიმდინარე წლის მაისში, 2019 წლის იმავე პერიოდთან შედარებით, ქვეყნის ეკონომიკა 8,8%-ით არის გაზრდილი.

რაც შეეხება სექტორალურ ანალიზს, საქსტატის ინფორმაციით, 2021 წლის მაისში, წინა წლის შესაბამის პერიოდთან შედარებით, ზრდის მიმართულებით მნიშვნელოვანი წვლილი შეიტანა შემდეგმა დარგებმა: დამამუშავებელი მრეწველობა, საფინანსო და სადაზღვევო საქმიანობა, ვაჭრობა, უძრავ ქონებასთან დაკავშირებული საქმიანობა, სასტუმროები და რესტორნები, მშენებლობა, ტრანსპორტი და დასაწყობება.

საქსტატის ანგარიშში აღნიშნულია, რომ 2021 წლის იანვარ-მაისში საქონლის ექსპორტი 24,4%-ით, ხოლო იმპორტი 15,7%-ით გაიზარდა. შესაბამისად, საგარეო სავაჭრო ბრუნვა 18,2%-ით არის გაზრდილი.

მიმდინარე წლის მაისში ახლადრეგისტრირებულ საწარმოთა რაოდენობა წლიურად 12,5%-ით, 3 581-მდე გაიზარდა. ამავე პერიოდში დღგ-ს გადამხდელ საწარმოთა ბრუნვა 50,3%-ით 8,2 მილიარდ ლარამდე გაიზარდა.

შეგახსენებთ, რომ საქართველოს ეკონომიკის შემცირება გასული წლის მარტიდან დაიწყო, რაც კორონავირუსით გამოწვეული პანდემიის ფონზე მიღებულ შეზღუდვებს უკავშირდებოდა. ეკონომიკის ვარდნის ტენდენცია გაგრძელდა მომდევნო თვეებშიც. ბოლო გათვლების მიხედვით, 2020 წლის მეორე კვარტალში ქვეყნის მთლიანი შიდა პროდუქტი 13,2%-ით, მესამე კვარტალში — 5,6%-ით, ხოლო მეოთხე კვარტალში 6,8%-ით შემცირდა. წლიურად, 2020-ში საქართველოს ეკონომიკამ 6,2%-ით იკლო. რაც შეეხება მიმდინარე წლის სტატისტიკას, პირველ კვარტალში ქვეყნის ეკონომიკა 4,5%-ით შემცირდა, ხოლო აპრილში ეკონომიკის წლიური ზრდის რეკორდული 44,8%-იანი მაჩვენებელი დაფიქსირდა.

რაც შეეხება პროგნოზებს, საქართველოს მთავრობა მიმდინარე წელს ეკონომიკის 6,5%-იან ზრდას ელოდება. ფინანსთა მინისტრის, ლაშა ხუციშვილის თქმით, თუ ქვეყანაში ოპტიმისტური სცენარი განვითარდება, შესაძლებელია, 2021 წელს ეკონომიკური ზრდა 10,2%-იანიც იყოს. მსოფლიო ბანკი კი, 2021 წელს საქართველოს ეკონომიკის 6%-ით გაზრდას პროგნოზირებს. ორგანიზაციის მიერ გავრცელებულ რელიზში აღნიშნულია, რომ როგორც საქართველოში, ასევე სხვა ქვეყნებშიც ეკონომიკის ზრდა, უმთავრესად, პანდემიასთან დაკავშირებული შოკების აღმოფხვრაზე იქნება დამოკიდებული.