"რუსეთი იმედოვნებს, რომ სამხრეთ ოსეთთან დაკავშირებით საქართველოს დადებითი განზრახვები რეალურ ნაბიჯებად გადაიქცევა; მოსკოვი დიპლომატიური ურთიერთობების აღდგენისთვის იმდენადაა მზადა, რამდენადაც ქართული მხარე", — ამის შესახებ ბრიფინგზე რუსეთის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ განაცხადა.

მან აღნიშნა, რომ 2024 წელს საქართველომ "რა თქმა უნდა, დადებითი სიგნალები" გააგზავნა, კერძოდ, სამხრეთ ოსეთისთვის ბოდიშის მოხდის აუცილებლობასთან დაკავშირებით.

"ვიმედოვნებთ, რომ ისინი [სიგნალები] გამოიხატება კონკრეტულ ნაბიჯებში საქართველოსა და აფხაზეთსა და სამხრეთ ოსეთს შორის ურთიერთობების ნორმალიზებისთვის", — განაცხადა დიპლომატმა.

საგარეო საქმეთა სამინისტროს ოფიციალურმა წარმომადგენელმა შეახსენა, რომ რუსეთის ფედერაციასა და საქართველოს შორის დიპლომატიური ურთიერთობების გაწყვეტა რუსული მხარის ბრალი არ ყოფილა; ამაში მაშინდელი პრეზიდენტ მიხეილ სააკაშვილის რეჟიმი იყო დამნაშავე.

"ჩვენ მზად ვართ მათი აღსადგენად, მზად ვართ წავიდეთ იქამდე, რამდენადაც ქართული მხარე მზად იქნება. ჩვენთვის აქ არანაირი შეზღუდვა არ არსებობს", — აღნიშნა ზახაროვამ.

ზახაროვას თქმით, მოსკოვი მზადაა საქართველოსთან ორმხრივად სასარგებლო თანამშრომლობა კიდევ უფრო განავითაროს.

"ამისათვის უზარმაზარი შესაძლებლობები არსებობს. საქართველოსთვის კი რუსეთი ბევრ სფეროში, განსაკუთრებით ღვინის პროდუქტებისა და ხილის, ძირითად ბაზრად რჩება. მეორეს მხრივ, რუსეთი საქართველოსთვის ენერგიისა და მარცვლეულის წამყვანი მიმწოდებელია", — დააკონკრეტა მან.