უკრაინამ და შეერთებულმა შტატებმა ხელი მოაწერეს მემორანდუმს მინერალური რესურსების შეთანხმების გაფორმების შესახებ, რომელიც ორივე ერისთვის სასარგებლო იქნება.

17 აპრილს შეერთებული შტატების პრეზიდენტმა დონალდ ტრამპმა განაცხადა, რომ უკრაინასთან შეთანხმება შესაძლოა, 24 აპრილს გაფორმდეს.

"დღეს ჩვენ გადავდგით ნაბიჯი შეერთებულ შტატებთან ერთობლივი ეკონომიკური პარტნიორობის შეთანხმებისკენ. უკრაინამ და ამერიკის შეერთებულმა შტატებმა ხელი მოაწერეს მემორანდუმს, რომელიც აჩვენებს ჩვენი გუნდების კონსტრუქციულ ერთობლივ მუშაობას და განზრახვას, დაასრულონ და დადონ შეთანხმება, რომელიც სასარგებლო იქნება ჩვენი ორივე ხალხისთვის.

ჩვენ ვემზადებით უკრაინის აღდგენის საინვესტიციო ფონდის შესაქმნელად. შესაბამისი შეთანხმება უკრაინასა და შეერთებულ შტატებს შორის მნიშვნელოვანი ინვესტიციების, ინფრასტრუქტურის მოდერნიზაციისა და ურთიერთსასარგებლო პარტნიორობის შესაძლებლობებს გახსნის — სწორედ ამ მიზნით მუშაობენ გუნდები დოკუმენტზე," — აცხადებს უკრაინის ეკონომიკის მინისტრი იულია სვირიდენკო.

მისი თქმით, ამ დოკუმენტით მხარეებმა დაადასტურეს "ამერიკელი ხალხის სურვილი, უკრაინელ ხალხთან ერთად ჩადონ ინვესტიცია თავისუფალ, სუვერენულ და უსაფრთხო უკრაინაში".

როგორც უკრაინული მედია წერს, წინ არის შეთანხმების ტექსტის საბოლოო დამუშავება, მისი ხელმოწერა და პარლამენტების მიერ რატიფიცირება.