Moderna გრიპისა და აივ ინფექციის ვაქცინების კლინიკურ კვლევებს უკვე წელს დაიწყებს, რესპირატორულ-სინციტური ვირუსის (RSV) ვაქცინის კანდიდატის კვლევის პირველი ფაზა კი უკვე დაიწყო.

აივ ინფექციის ვაქცინისთვის კომპანიას ორი კანდიდატი ჰყავს — mRNA-1644 და mRNA-1574. პირველი მათგანი სრულიად ახალ მიდგომას იყენებს — იგი ადამიანის ორგანიზმში ფართოდ გამანეიტრალებელ აივ-1 ანტისხეულებს (bNAbs) წარმოქმნის. ეს უკანასკნელი Moderna-მ შიდსის ვაქცინის საერთაშორისო ინიციატივასთან (IAVI) და ბილ და მელინდა გეიტსების ფონდთან თანამშრომლობის ფარგლებში შექმნა. mRNA-1644-ის შესწავლის პირველ ფაზაში, მიდგომის ეფექტიანობის შესამოწმებლად, ვაქცინას ადამიანებზე დატესტავენ და გამოიყენებენ ანტიგენებსაც. (ანტიგენი ორგანიზმისთვის უცხო ნივთიერებაა, რომელიც კანქვეშ, კუნთებსა ან სისხლში შეყვანის შემდეგ სხეულში ანტისხეულებს წარმოქმნის).

მეორე მიდგომა — mRNA-1574, რომელიც ამჟამად აშშ-ს ჯანდაცვის ეროვნული ინსტიტუტის (NIH) შეფასებას გადის, ერთმანეთის მსგავს რამდენიმე ტრიმერულ ანტიგენს იყენებს.

Moderna ასევე მუშაობს გრიპის ვაქცინის რამდენიმე კანდიდატზე, რომლებიც ანტიგენების კომბინაციისგან შედგებიან. ვაქცინა იმ ოთხი სხვადასხვა სეზონური ვირუსის წინააღმდეგ იმოქმედებს, რომელთა შესახებაც რეკომენდაცია WHO-მ გასცა. კომპანია ამ პროგრამის კლინიკური კვლევების პირველ ფაზასაც წელს დაიწყებს.

ასევე იხილეთ: შემდეგი პოდკასტი: ვაქცინაცია — კაცობრიობის იარაღი მიკრობულ სამყაროსთან ომში

გარდა ამისა, ისინი გეგმავენ შეისწავლონ ვაქცინების კომბინაციის მოქმედებს გრიპის, SARS-CoV-2-ის, რესპირატორულ-სინციტური ვირუსისა(RSV) და ადამიანის მეტაპნევმოვირუსის (hMPV) წინააღმდეგ.

აღსანიშნავია, რომ ამჟამად ბაზარზე არსებული გრიპის ვაქცინების ეფექტიანობა 40-60%-ია. Moderna-ს აზრით, ამ მაჩვენებლის გაუმჯობესება mRNA ტექნოლოგიითაა შესაძლებელი. კომპანიის თქმით, მათ გრიპის ვაქცინას კვერცხზე დაფუძნებულ ვაქცინასთან შედარებით სხვა უპირატესობებიც ექნება, ერთი მხრივ, მისი წარმოების თვალსაზრისით, მეორე მხრივ კი იმის გათვალისწინებით, რომ იგი უფრო ზუსტად იმოქმედებს ვირუსის წინააღმდეგ (კვერცხზე დაფუძნებულმა ვაქცინამ, შესაძლოა, გაუმიზნავად გამოიწვიოს ანტიგენური ცვლილება ვაქცინის ვირუსში).

Modernaმ ამ კვირაში RSV ვაქცინის კანდიდატის — mRNA-1345-ის პირველი ფაზის შუალედური ანალიზი გამოქვეყნა. აღმოჩნდა, რომ mRNA-1345 ვაქცინის ერთი 50 მიკროგრამიანი ან 100 მიკროგრამიანი დოზა უმეტესად კარგად მიიღეს 18-49 წლის მოზრდილებმა.

შედეგებმა აჩვენა, რომ ვაქცინამ გაზარდა RSV გამანეიტრალებელი ანტისხეულების რაოდენობა შედარებით ახალგაზრდა სეროდადებით მონაწილეებში. (სისხლის შრატში გარკვეული მარკერის, ამ შემთხვევაში RSV-ის სპეციფიკური დონის არსებობა ითვლება სეროდედაბითად, არარსებობა კი — სეროუარყოფითად). გამანეიტრალებელი ანტისხეულები შეინიშნებოდა რაღაც დონეზე ყველა მონაწილეში, როგორც მოსალოდნელი იყო. mRNA-1345 ვაქცინის ერთმა 50 ან 100 მიკროგრამიანმა დოზამ გაზარდა გამანეიტრალებელი ანტისხეულები, როგორც RSV-A, ასევე RSV-B სეროტიპების წინააღმდეგ. აღსანიშნავია, რომ ამჟამად RSV-ისთვის დადასტურებული ვაქცინა არ არსებობს. Moderna-ს ინფექციური დაავადებების მიმართულების უფროსი ვიცე-პრეზიდენტის, ჟაკლინ მილერის თქმით, ისინი ასევე შეაფასებენ mRNA-1345-ისა და სხვა რესპირატორული ვირუსის ვაქცინების შესაძლო კომბინაციებს.

ამჟამად, Moderna-ს ვაქცინებიდან ყველაზე განვითარებულ კანდიდატს ციტომეგალოვირუსის (CMV) ვაქცინა წარმოადგენს. კომპანია მალე დაიწყებს მესამე საკვლევ ფაზას, რომელშიც 16-40 წლის 8000 სერონეგატიური ქალი ჩაერთვება აშშ-დან, ევროპიდან და აზიის წყნარი ოკეანეთიდან.

ასევე იხილეთ: როგორ შექმნეს კოვიდვაქცინა "ასე სწრაფად" და რა ვიცით არსებულ ვაქცინებს შორის განსხვავებებზე