იუსტიციის უმაღლესი საბჭოს ახლადარჩეული წევრის, გოჩა აბუსერიძის მტკიცებით, არ იცოდა, კანდიდატად თუ იყო წარდგენილი. მისი თქმით, დღეს ერთ-ერთმა კოლეგამ წარადგინა. ამის შესახებ მან ჟურნალისტებს არჩევის შემდეგ განუცხადა. მას ჰკითხეს იმის შესახებ, რომ ნაზი ჯანეზაშვილის თქმით, საბჭოში მხოლოდ ის ადამიანები ინიშნებიან, რომლებსაც მოსამართლეთა გავლენიანი ჯგუფი ლობირებს. აბუსერიძის თქმით, ამგვარი შეკითხვა მისთვის შეურაცხმყოფელია და როცა უზენაესი სასამართლოს კონკურსში მონაწილეობდა, მაშინ ნაზი ჯანეზაშვილს "არგუმენტირებულად" უპასუხა.

"ამგვარი შეკითხვა ჩემთვის, როგორც მოსამართლისთვის არის შეურაცხმყოფელი, იმიტომ რომ თავისი შინაარსობრივი დატვირთვით მიმართულია მხოლოდ სასამართლოს დისკრედიტაციისკენ. არანაირი ზეწოლა, წინასწარი შეთანხმება არ ყოფილა, მოლოდინის რეჟიმშიც არ ვყოფილვარ, რომ დღეს წარდგენილი ვყოფილიყავი საბჭოს წევრის კანდიდატურაზე. ამგვარი შეკითხვა და ისეთი საუბრები, რომ კლანი არსებობს, არის დემაგოგია და მიმართულია სასამართლოს დისკრედიტაციისკენ. შეგიძლიათ ჩემი პროფესიული მოღვაწეობაც გამოიკვლიოთ, წარსულიც, თუგინდ კავშირებიც", — აცხადებს აბუსერიძე.

მას ჰკითხეს, მისი აზრით, არსებობს თუ არა სასამართლოში კლანი. კითხვას მან ასე უპასუხა:

"სასამართლო სისტემაში არსებობს სასამართლოს კორპორაცია და სასამართლოს მართავენ მოსამართლეები".

კითხვას, იყო თუ არა ინფორმირებული მისი არჩევის შესახებ, აბუსერიძე პასუხობს:

"არ ვიცი, არამგონია".

ამასთან, ის ამბობს, რომ ჩინჩალაძეს იცნობს, თუმცა ამ საკითხზე კომუნიკაცია არ ჰქონია.

აბუსერიძემ თქვა ისიც, რომ არჩევა მისთვის დიდი პასუხისმგებლობაა და მაქსიმუმს გააკეთებს, რომ "სასამართლო იყოს უკეთესი, ვიდრე დღეს არის".

გოჩა აბუსერიძე 2020 წლიდან თბილისის სააპელაციო სასამართლოს მოსამართლეა. 2020 წელს აბუსერიძე უზენაესი სასამართლოს მოსამართლეობის კანდიდატი იყო. გასაუბრებაზე ქართველი ქალის დახასიათებისას მან თქვა, რომ დედობა და შვილების გაჩენა ერთ-ერთი მთავარი კომპონენტია.

დღეს, 26 მაისს, მოსამართლეთა რიგგარეშე კონფერენციაზე იუსტიციის უმაღლესი საბჭოს 4 წევრი აირჩიეს. კერძოდ, ლევან მიქაბერიძე, თემურ გოგოხია, ბადრი შონია და გელა აბუსერიძე.

მოსამართლეთა რიგგარეშე კონფერენციის პარალელურად, იუსტიციის უმაღლეს სკოლასთან აქცია მიმდინარეობდა. აქტივისტები საბჭოს წევრების არჩევას აპრიტესტებენ და პროცესის შეჩერებას ითხოვენ.

შეგახსენებთ, რომ ევროკავშირის ელჩმა, კარლ ჰარცელმა, აშშ-ის ელჩმა, კელი დეგნანმა და ევროპის საბჭოს ოფისის ხელმძღვანელმა, ნატალია ვუტოვამ პარლამენტის თავმჯდომარეს წერილი მისწერეს და შარლ მიშელის შეთანხმებით აღებული პასუხისმგებლობები და ვალდებულებები შეახსენეს. კერძოდ, დიპლომატები აღნიშნავენ, რომ უზენაეს სასამართლოში მოსამართლეების და იუსტიციის უმაღლესი საბჭოს წევრების დანიშვნის პროცესი დაუყოვნებლივ უნდა შეჩერდეს. მათი განცხადებით, ეს აჩვენებს ნამდვილ ერთგულებას მართლმსაჯულების გამჭვირვალობასა და მის მიმართ ნდობის გაზრდის საქმეში.

წერილს წერილითვე უპასუხა კახა კუჭავამ. პარლამენტის თავმჯდომარის განცხადებით, კონსტიტუციისა და შესაბამისი კანონმდებლობის თანახმად, პარლამენტს იუსტიციის უმაღლესი საბჭოს არამოსამართლე წევრების დამტკიცება მიმდინარე წლის ივნისში ევალება. სპიკერი აღნიშნავს, რომ საქართველოს პარლამენტი არ არის უფლებამოსილი, დაელოდოს 2022 წლის საგაზაფხულო სესიაზე განსახორციელებელ საკანონმდებლო ცვლილებებს და საბჭოში ხუთი ვაკანსია მომდევნო ერთი წლის განმავლობაში შეუვსებელი დატოვოს.

შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმებაში წერია, რომ არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.