ნაციონალური მოძრაობის თავმჯდომარის, ნიკა მელიას განცხადებით, სალომე სამადაშვილის გადაწყვეტილების გამო მისი მტრად გამოცხადება არ შეიძლება. როგორც მელია აღნიშნავს, გული წყდება, რადგან ციხეში რომ არ ყოფილიყო, ეს კონფლიქტი არ მოხდებოდა და ურთიერთობებს გაუფრთხილდებოდა.

"ის რაც მოხდა რომ არ მომხდარიყო, ვიქნებოდი ძალიან ბედნიერი, ძალიან განვიცადე. თუმცა ამის გამო მტრად გამოცხადება ადამიანისა არ შეიძლება.

ხომ იცით, ინგლისელები ამბობენ: "Divorce is better than unhappy marriage" (განქორწინება სჯობს უბედურ ქორწინებას). თუ პარტიაში ბედნიერად ვერ გრძნობს ადამიანი [თავს], ბუნებრივია, ჯობია, ცივილიზებულად ჩვენი გზები არათუ გაიყაროს, არამედ დაშორდეს დროებით ერთმანეთს. დარწმუნებული ვარ, მიზანი იგივე დარჩება", — განაცხადა მელიამ მთავარი არხის ეთერში.

მანვე აღნიშნა, რომ პარტიის ყოფილ თავმჯდომარეს, გრიგოლ ვაშაძეს სალომე სამადაშვილს არ შეადარებს "სამადაშვილის სასარგებლოდ".

"არანაირად არ შევადარებ, ახლოსაც ხაზს არ გავავლებ. რატომ იცით? სალომე სამადაშვილის გადაწყვეტილება იმ მომენტში შეიძლება ბევრმა მიიღო ისე, როგორც მიიღო და იყო ამის საფუძველი დავუშვათ, მაგრამ მას ეს არ დაუმალავს, თქვა, ისაუბრა პარტიაში და განსხვავებული პოზიციები დაფიქსირდა და მუდმივად ასეთი არის სალომე, რასაც ვიცნობ. [...]

რაც შეეხება ბატონ გრიგოლ ვაშაძეს, მე არ მინდა გავაკრიტიკო და არც გავაკრიტიკებ, უბრალოდ, აზრს და პოზიციას ვაფიქსირებ, არაფერი არ უთქვამს, არც წასვლაზე, არც განცხადების გავრცელებაზე და როგორ შევადარო სალომე და გრიგოლი", — განაცხადა მან.

სალომე სამადაშვილი და გრიგოლ ვაშაძე შარლ მიშელის შეთანხმების დოკუმენტის ხელმომწერები არიან. პარლამენტში ისინი ნაციონალური მოძრაობის სიით მოხვდნენ.

გრიგოლ ვაშაძემ ნაციონალური მოძრაობა 2020 წლის 15 დეკემბერს დატოვა. მაშინ მან აღნიშნა, რომ არის საკითხები, რომელსაც კატეგორიულად ვერ შეეგუება. მისი თქმით, ვერ შეეგუებოდა პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე არჩეულ ტაქტიკას.

რაც შეეხება სამადაშვილს, მას შემდეგ, რაც მან ხელმოწერაზე ენმ-ს გადაწყვეტილება გააკრიტიკა, პარტიის ხმარდამჭერები მის პირად ფეისბუქგვერდზე შეურაცხმყოფელ კომენტარებს წერდნენ. მაშინ On.ge-სთან საუბრისას სამადაშვილმა განაცხადა, რომ პარტიის პოლიტიკურ საქმიანობაში მონაწილეობას აღარ მიიღებდა. მისი თქმით, პარტიას არც პარლამენტში წარმოადგენდა და ენმ-ს დატოვებაზე ოფიციალურ განაცხადს მელიას ციხიდან გამოსვლის შემდეგ გააკეთებდა.