საპარლამენტო უმრავლეოსპბის ლიდერის, ნინო წილოსანის შეფასებით ამნისტიის შესახებ ოპოზიციის მიერ წარდგენილი კანონპროექტის მოტივი საზოგადოების დახლეჩა და დანაწევრებაა.

"იქ [ოპოზიციის მიერ წარდგენილ პროექტში] არის საზოგადოების კიდევ უფრო დახლეჩის და დაყოფის და გარკვეულწილად, დანაწევრების მოტივი ჩადებული. ვგულისხმობ იმას, რომ ამნისტია, მათი შემოთავაზებით, უნდა გავრცელდეს ოპოზიციის წარმომადგენლებზე, ვინც დანაშაული ჩაიდინა და არ უნდა ეხებოდეს პოლიციელებს, როგორც დაზარალებულებს. ამიტომ, სრულად არ ვეთანხმებით მათ შემოთავაზებას და მზად ვართ, რომ დისკუსიაში შევიდეთ", — განაცხადა ნინო წილოსანმა.

პარლამენტში ამნისტიის შესახებ ორი კანონპროექტია დარეგისტრირებული — ერთი ოპოზიციის და ერთიც მმართველი პარტიის.

ოპოზიციის პროექტის მიხედვით, იმისთვის, რომ კონკრეტულ სახელმწიფო მოხელეს არასათანადო ქმედებისთვის ამნისტია შეეხოს, ამაზე ამ ქმედებით დაზარალებული ადამიანი უნდა იყოს თანახმა. დეპუტატი, სალომე სამადაშვილი ამას ჩვეულებრივი მოქალაქეებისა და სამართალდამცველებისთვის განსხვავებული სტანდარტის არსებობის საჭიროებით ხსნის.

"სამართალდამცავები ასრულებდნენ საკუთარ ვალდებულებებს და მოქალაქეები გახდნენ უნებური მსხვერპლი ძალმომრეობის, რომელიც იმ დღეს გამოიჩინა სამართალდამცავმა სტრუქტურებმა. ამიტომ, ჩვენ მიგვაჩნია, რომ ეს არის როგორც პოლიტიკურად, ასევე მორალურად და რაც მთავარია, იურიდიულად გამართული არგუმენტი", — განმარტავს სამადაშვილი.

გაიგეთ მეტი: