გირჩის ერთ-ერთი ლიდერი, იაგო ხვიჩია აცხადებს, რომ თალაკვაძის განცხადებასთან დაკავშირებით გარკვეული საკითხები აქვთ დასაზუსტებელი და აკვირდებიან სიტუაციას, სანამ გადაწყვეტენ მოაწერენ თუ რა დოკუმენტს ხელს.

"ზოგადად, გამოქვეყნებულ დოკუმენტზე ხელმოწერა ხომ ნიშნავს იმის აღსრულებას და ეს აღსრულება ვისი ხელმოწერის შემთხვევაში დაიწყება, მაგალითად ნაციონალურმა მოძრაობამ რომ ხელი არ მოაწეროს, ჩემთანაც დებს ამას ქართული ოცნება, ანუ ნებისმიერ პარტიასთან დებს, მაინც აღასრულებს? კითხვები მაქვს ფიზიკურად იქიდან გამომდინარე, რომ ის დოკუმენტი თავისი შინაარსით, მაგალითად პოლიტიკური ამნისტია ხომ ეხება ნიკა მელიას და კამათი იყო იმაზე უნდა შეხებოდა, თუ არა რურუას. თუ მაგალითად, ნაციონალური მოძრაობა ხელს არ აწერს, ნიკა მელიას მაინც გამოუშვებენ ქართული ოცნების წევრები? თუ ნაციონალური მოძრაობის წინააღმდეგობის მიუხედავად მაინც გამოუშვებენ, ერთი საკითხია, თუ ისინი არ გამოუშვებენ და იტყვიან, რომ ეს იმ შემთხვევაში იმოქმედებს, თუ ხელს მოაწერს ნაციონალური მოძრაობა, მაშინ ჩემს ხელმოწერას ხომ საერთოდ შინაარსი არ გააჩნია. ჩვენ, უბრალოდ, ვაკვირდებით სიტუაციას სინამდვილეში რას ნიშნავს ბატონი თალაკვაძის განცხადება", — აცხადებს ხვიჩია On.ge-სთან საუბრისას.

მისივე თქმით, ჯერ უნდა გაერკვიონ, თუ რა დოკუმენტია ის, რომელზეც გამოაცხადა ქართულმა ოცნებამ მზაობა.

"ჯერ უნდა გავერკვიოთ რა დოკუმენტია ის, რაზეც ქართულმა ოცნებამ მზაობა გამოხატა. არ ვარ დარწმუნებული, რომ ის დოკუმენტია, რომელიც დანიელსონმა წარმოადგინა მოლაპარაკებებზე. იქ რამდენიმე ვერსიაზე იყო საუბარი, ქართული ოცნება იძახდა, რომ მე რაღაც უმნიშვნელო ცვლილებები მაქვს და ეს მაბრკოლებს და მაგას რომ გაითვალისწინებთ, მერე მოვაწერთ ხელს. ბევრი რამე ფიზიკურად არ ვიცი. შესაბამისად, უბრალოდ, მინდა გავერკვიო რაზეა საუბარი. თუ ეს ის დოკუმენტია, რაც მე მგონია, მაშინ ოპოზიცია რატომ არ აწერს ხელს ეს მაინტერესებს", — ამბობს ხვიჩია.

გირჩის ერთ-ერთი ლიდერი ამბობს, რომ აღნიშნული კითხვების დასმის შემდეგ ექნება დოკუმენტის ხელმოწერასთან დაკავშირებით პოზიცია.

პარლამენტის თავმჯდომარის, არჩილ თალაკვაძის განცხადებით, ქართული ოცნება ევროპული საბჭოს პრეზიდენტის, შარლ მიშელის ეგიდით შექმნილ დოკუმენტს ხელს აწერს. მისივე თქმით, დოკუმენტს ზუსტად შემოთავაზებული სახით აწერენ ხელს და შესაბამისად, პარლამენტი იმსჯელებს და მხარს დაუჭერს ივნისის მოვლენების ამნისტიასაც. ამასთან, თალაკვაძემ აღნიშნა, რომ ქართული ოცნება მზად არის, 40%-იანი მხარდაჭერის პრინციპი გამოიყენოს, რაც იმას ნიშნავს, რომ, თუ მმართველი პარტია თვითმმართველობის არჩევნებში 40%-ს ვერ მიიღებს, ისინი ოპოზიციის მოთხოვნებს რიგგარეშე არჩევნებთან დაკავშირებით განიხილავენ.

თალაკვაძის განცხადებას წინ უძღოდა ქართული ოცნების თავმჯდომარის, ირაკლი კობახიძის ამერიკის შეერთებულ შტატებში ვიზიტი. კობახიძის განცხადებით, აშშ-ში შეხვედრებისას პარტნიორები მიანიშნებენ, რომ მათ, როგორც მმართველმა პარტიამ კრიზისის გადასაჭრელად ნაბიჯები უნდა გადადგან.

30 მარტს ქართული ოცნებისა და ოპოზიციის მორიგი მედიაცია უშედეგოდ დასრულდა. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. თავდაპირველად ხელი არ მოაწერა არც მმართველმა პარტიამ.

• რა ეწერა დოკუმენტში, რომელსაც მხარეებმა ხელი არ მოაწერეს

კრისტიან დანიელსონის მიერ წარმოდგენილ დოკუმენტში საკითხები რამდენიმე პუნქტად იყო დაყოფილი. ის ეხებოდა:

• პოლიტიზებულ მართლმსაჯულებად აღქმულ საკითხებზე რეაგირებას;
• ამბიციურ საარჩევნო რეფორმას;
• კანონის უზენაესობა/სასამართლო რეფორმას;
• პარლამენტში ძალაუფლების განაწილებას;
• მომავალ არჩევნებს.

უშედეგოდ დასრულდა შეხვედრა დანიელსონის პირველი ვიზიტის დროს, 18 მარტსაც. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.