თვეზე ნაკლები დარჩა ოსკარების 2021 წლის დაჯილდოებამდე და ჯერ კიდევ ბევრი რამ დაზუსტებული არ არის, თუ როგორი იქნება წლევანდელი ცერემონია.

აქამდე ორგანიზატორებმა მხოლოდ ის გაგვიმხილეს, რომ კოვიდ-ეპოქაში აპრობირებულ მეთოდს — ზუმში შეხვედრებს ისინი არ მიესალმებიან და მაქსიმალურად ეცდებიან, დაჯილდოება მეტ-ნაკლებად ტრადიციული ფორმით, დამსწრე საზოგადოებასთან ერთად გაიმართოს.

ამ გადაწყვეტილებას კრიტიკა მოჰყვა, რადგან, მართალია, ნომინანტთა უმეტესობა ამერიკელია და შედარებით მარტივად შეძლებს ლოს-ანჯელესში გამართულ ცერემონიაზე დასწრებას, თუმცა, მაგალითად, საუკეთესო საერთაშორისო ფილმის ნომინაციის კანდიდატებისთვის ამის მოხერხება მთელ რიგ ხარჯებთან, ჯანმრთელობის უსაფრთხოებასთან და მათი ქვეყნის გადაადგილებასთან დაკავშირებულ შეზღუდვებთანაა პირდაპირ დაკავშირებული.

ოსკარი 2021-ის ნომინანტები დასახელდნენ — სრული სია

სავარაუდოდ, სწორედ ამ კრიტიკის გათვალისწინების შემდეგ, ცოტა ხნის წინ ორგანიზატორებმა სპეციალური შეხვედრა გამართეს, სადაც განაცხადეს, რომ ლოს-ანჯელესთან ერთად კიდევ სხვა ადგილებიდან შეეძლებათ მონაწილეებს დასწრება — დაჯილდოება დოლბის თეატრთან ერთად პარალელურად სხვა ადგილებშიც გაიმართება.

"ლონდონი უკვე 100%-ით დადასტურებულია და სხვა ქვეყნებზეც მოლაპარაკებები მიმდინარეობს", — აღნიშნეს მათ.

ყველა მონაწილეს, რომელიც ლოს-ანჯელესში გამართულ შოუს დაესწრება, წინასწარი შემოწმების გავლა მოუწევს: გაითვალისწინებენ იმას, თუ რომელი ქვეყნიდნა მოდის (გადაღებების ან სხვა მიზეზის გამო), ვაქცინა აქვს თუ არ გაკეთებული და ა.შ. წინასწარ მათ კორონავირუსის ტესტიც გაუკეთდებათ, რასაც თვითონ კინოაკადემია უზრუნველყოფს.

ჯერჯერობით უცნობია, ნომინანტებს დაჯილდოებაზე პირბადით ყოფნა მოუწევთ თუ არა.

შეიცვალა ტრადიციული წითელი ხალიჩის წესიც: მხოლოდ ოც ადამიანს შეეძლება ფოტოკამერების წინ გავლა, რომლებიც ასევე მოკრძალებული რაოდენობის იქნება — მარტო ოთხი ფოტოგრაფი მიიღებს აკრედიტაციას.

ოსკარების დაჯილდოება, როგორც წესი, თებერვლის ბოლოს იმართება ხოლმე, თუმცა წელს პანდემიის გამო ეს თარიღიც შეიცვალა და 25 აპრილამდე გადაიწია.