ოსკარის დაჯილდოების ცერემონია კინოსამყაროს ერთ-ერთი ყველაზე მნიშვნელოვანი მოვლენაა, რომელსაც კინომანები განსაკუთრებული ინტერესით ელიან. მართალია, პანდემიის გამო უამრავი ღონისძიება დისტანციურ რეჟიმში, ზუმის მეშვეობით ჩატარდა, თუმცა ეს ოსკარის წლევანდელ ცერემონიას არ შეეხება. როგორც პროდიუსერებმა განაცხადეს, ნომინანტებს ღონისძიებაზე დასწრება ზუმის საშუალებით არ შეეძლებათ.

წლევანდელი ცერემონია შედარებით მოკრძალებული იქნება, რადგან მას მხოლოდ ნომინანტები, წარმდგენები და მათი სტუმრები დაესწრებიან. ცერემონიის დაწყებამდე დამსწრე საზოგადოებას კოვიდის ტესტს ჩაუტარებენ. საღამოს განმავლობაში მობილიზებული იქნება სამედიცინო ჯგუფიც.

"ცერემონიაზე ზუმით დასწრების შესაძლებლობა არ იქნება. ჩვენ ძალიან ბევრს ვმუშაობთ იმისთვის, რომ უსაფრთხო და სასიამოვნო საღამო შევუქმნათ თითოეულ თქვენგანს ისევე, როგორც მილიონობით გულშემატკივარს მსოფლიოს გარშემო და ვფიქრობთ, რომ ვირტუალური ცერემონია ჩვენს ძალისხმევას დააკნინებს", — წერია ნომინანტებისადმი პროდიუსერების მიმართვაში.

მიმართვაში ყურადღება გამახვილებულია ჩაცმულობაზეც. პროდიუსერების განცხადებით, დამსწრე საზოგადოებას შეუძლია, ცერემონიას მსგავსი შემთხვევებისთვის შესაფერისი ოფიციალური სამოსით დაესწროს. მათი თქმით, არაოფიციალური ჩაცმულობა მისაღები არ იქნება. შესაბამისად, გამარჯვებულები წარმატებას მსახიობ ჯეისონ სუდეიკისის მსგავსად სვიტრით ან ზუმის წყალობით შემოჩვეული პიჟამებით ნამდვილად ვერ იზეიმებენ.

შეგახსენებთ, რომ ოსკარის ცერემონია 26 აპრილს გაიმართება.

ამავე თემაზე: