On.ge-მ ევროპული საბჭოს პრეზიდენტის წარმომადგენლის, კრისტიან დანიელსონის მიერ შეთავაზებული დოკუმენტის შინაარსი მოიპოვა. ჩვენი წყაროს ინფორმაციით, ეს არის ის თემები, რაზეც ოპოზიცია და ხელისუფლება ამ წუთებშიც მსჯელობენ. საუბარია პოლიტპატიმრების გათავისუფლებაზე, თუმცა არაფერი წერია ვადამდელი არჩევნების შესახებ.

აღსანიშნავია, რომ ეს არის წარმოდგენილი დოკუმენტის შინაარსი და არა ზუსტი ციტირება.

On.ge-ს წყაროს ინფორმაციით, დოკუმენტის თანახმად:

  • ნაციონალური მოძრაობის თავმჯდომარის, ნიკა მელიას გირაოს თანხას ევროკავშირი გადაიხდის;
  • გიორგი რურუა ციხიდან ელექტრონული სამაჯურით ნოემბერში გამოვა, დასახელდა 19 ნოემბერიც. ასევე, საუბარია რურუას გათავისუფლებაზე უდოს კომისიის საშუალებით;
  • განიხილება სრულად პროპორციული არჩევნები. 0-დან 3%-მდე ბარიერით;
  • 4 წევრი ქმნის ფრაქციას;
  • პროკურორის დანიშვნა მოხდება პარლამენტის შემადგენლობის 2/3-ით;
  • ცესკოს თავმჯდომარე დაინიშნოს პარლამენტის 2/3-ით და მოადგილე იყოს ოპოზიციის დასახელებული;
  • ბიულეტენების გადათვლასთან დაკავშირებით, შეიქმნას ნათელი კრიტერიუმები, სავარაუდოდ, 10%-იან ცდომილებაზე მოხდეს ავტომატური გადათვლა;
  • პარტიების რეგისტრაციისა და დაფინანსების განხილვისას, უნდა გაითვალისწინონ ვენეციის კომისიის რეკომენდაციები;
  • გაიზარდოს მართლმსაჯულების სისტემის ხარისხი — აქ იგულისხმება როგორც მოსამართლეების დანიშვნა-შერჩევაა, ასევე, ახალი კანონპროექტი, რომელიც უზენაეს სასამართლოს შეეხება;
  • შეჩერდეს მოსამართლეების დანიშნვნა;
  • გენერალური პროკურორის დანიშვნისას იყოს საჯარო დებატები, ასევე, მულტიპარტიული შეთანხმება, კერძოდ, საუბარია უმრავლესობის მხარდაჭერაზე პარლამენტში;
  • 5 კომიტეტს უხელმძღვანელოს ოპოზიციამ, მათ შორის, საპროცედუროს, იურიდიულს, საგარეოს, ფინანსთა და იყოს 2-ის თავმჯდომარე;
  • საარჩევნო რეფორმის საფუძველზე ოპოზიციამ მიიღოს ადგილობრივ არჩევნებში მონაწილეობა.

დანიელსონის მედიაციით მხარეებს შორის შეხვედრა 17:00 საათზე დაიწყო. ის მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.