ქართული ოცნების ერთ-ერთი ლიდერი შსს-ს განცხადებას ეხმაურება, სადაც ნათქვამია, რომ რუსთავი 2-ის გენერალური დირექტორის ნიკა გვარამიასა და თბილისის საქალაქო სასამართლოს ყოფილ თავმჯდომარეს შორის ჩაწერილი აუდიო ჩანაწერი ავთენტური და დაუმონტაჟებელია.

თალაკვაძე აცხადებს, რომ ამით სახეზეა გვარამია-ახვლედიანის სავარაუდო კორუფციული გარიგების მატერიალურ-ტექნიკური მტკიცებულებები და იგი მოუწოდებს პროკურატურას დაუყოვნებლივ გამოიძიოს აღნიშნული საქმე.

მისივე განცხადებით, პროკურატურამ სწრაფად უნდა გამოიძიოს ისიც, ჰქონდა თუ არა ადგილი, მოსამართლე ახვლედიანის მხრიდან, "უკანონოდ მიღებული მილიონიანი ქონების უტიფარი ლეგალიზაციის შემთხვევას".

არჩილ თალაკვაძის თქმით, ნიკა გვარამია, სავარაუდოდ, სასამართლოს საქმიანობაში ერეოდა:

"ახლა, ნათელი ხდება ამ პოლიტიკური ისტერიის რეალური მიზეზებიც, რასაც უკანასკნელი დღეების განმავლობაში ვაკვირდებით ნაციონალური მოძრაობის მხრიდან. მას შემდეგ, რაც გახმაურდა რუსთავი 2-ის საქმის მოსამართლეების, ალავიძისა და ქათამაძის საქმეებზე, ყოფილი ხელისუფლების წარმომადგენლების მხრიდან სავარაუდო ზეწოლისა და მათი მოსყიდვის მცდელობის ფაქტები, ნაციონალურ მოძრაობასა და ნიკა გვარამიას სხვა არაფერი დარჩენოდათ, თუ არა დაეგეგმათ და განეხორციელებინათ საჯარო პროვოკაციების სერია უზენაეს სასამართლოსთან და მერიასთან. მანამდე კი, ეწარმოებინათ ცილისმწამებლური კამპანია მოსამართლეების მიმართ, რომლებზეც ზეგავლენა თავად ვერ მოახდინეს".

საქართველოს შინაგან საქმეთა სამინისტროს პრესსამსახურის ინფორმაციით, ტელეკომპანია რუსთავი 2-ის გენერალური დირექტორის, ნიკა გვარამიასა და თბილისის საქალაქო სასამართლოს ყოფილი თავმჯდომარის, მამუკა ახვლედიანის გავრცელებული ჩანაწერია ავთენტურია. ჩანაწერი გასული წლის 3 ოქტომბერს გავრცელდა.

ნიკა გვარამია საგამოძიებო უწყებაში დღეს 18 საათამდე, გამოკითხვის მიზნით, არის დაბარებული, 15 საათზე კი - პრესკონფერენციას მართავს.