რუსთავი 2-ის გენერალურმა დირექტორმა, ნიკა გვარამიამ, 3 ოქტომბერს ბრიფინგზე განაცხადა, რომ მისი და საქალაქო სასამართლოს ყოფილი თავმჯდომარის, მამუკა ახვლედიანის ჩანაწერი თავად გააკეთა, თუმცა მისივე თქმით, ქსელში ვიღაც სხვამ გაავრცელა:

"ფარული ჩანაწერები პირველი არ არის ჩემთვის, მაგრამ ამ ტიპის გამოყენებული მასალა ნამდვილად პირველია. ეს ჩანაწერი გაკეთებულია ჩემ მიერ. ეს არ არის სატელეფონო ჩანაწერი, ეს ჩანაწერი გადაღებულია ჩემ მიერ, ფარულად. ეს მოვლენები, რომლებიც ამ ჩანაწერშია, ხდებოდა დაახლოებით ერთი წლის წინ იყო, როდესაც ჩვენი საქმე პიკში იყო და კომუნიკაციის სურვილი გამოხატა სასამართლოს თავმჯდომარემ. ცხადია, ჩემს მოადგილეებს ვესაუბრე ამ საკითხთან დაკავშირებით, ღირდა თუ არა შეხვედრა და ერთობლივად გადავწყვიტეთ, რომ რა თქმა უნდა ღირდა და მივიღე რჩევა, შესაბამისი ტექნიკით აღჭურვილი ვყოფილიყავი ამ შეხვედრაზე, რათა რამე პროვოკაციას არ ჰქონოდა ადგილი შემდგომში, ან თუ რამე მნიშვნელოვანი იქნებოდა ნათქვამი, გამოგვეყენებინა შემდეგ მტკიცებულებად".

გვარამიას განცხადებით, პრობლემაა ის, თუ როგორ მოხვდა ქსელში მის მიერ გაკეთებული ფარული ჩანაწერი, რადგან მისივე თქმით, ვინაიდან მნიშვნელოვან ინფორმაციას არ შეიცავდა, იგი მაშინვე განადგურდა.

"ჩანაწერი იყო ჩემს კომპიუტერში დაცული და იყო ჩვენს ქსელში. საქმე გვაქვს ახალ დანაშაულთან რასაც ჰქვია კომპიუტერულ ქსელში შეღწევა. საქმე გვაქვს კიბერდანაშაულთან".