საქართველოს ახალგაზრდა იურისტთა ასოციაციის თავმჯდომარე, ნიკა სიმონიშვილი აცხადებს, რომ ნაციონალური მოძრაობის თავმჯდომარის, ნიკა მელიას საქმეზე სასამართლო და პროკურატურა ინსტრუმენტებად გამოიყენეს პოლიტიკური ინტერესების გასატარებლად.

"პროცესი იყო გაჩერებული და როცა დასჭირდათ, ისევ აამუშავეს. ამიტომ, აქ პოლიტიკური მოტივები, რა თქმა უნდა, იდგა. შესაბამისად, ჩვენ პირდაპირ შეგვიძლია ვთქვათ, რომ პოლიტიკური ინტერესებისთვის სასამართლო და პროკურატურა ინსტრუმენტებად იყო გამოყენებული. პოლიტიკური გადაწყვეტილებებით ხდებოდა სამართლებრივი პროცესების წარმართვა", — განაცხადა ნიკა სიმონიშვილმა.

საია-ს თავმჯდომარემ ნიკა მელიას საქმე პლატფორმა Clubhouse-ის On.ge-ს ოთახში შეაფასა. იგი განმარტავს, რატომ იყო მელიას საქმე პოლიტიკურად მოტივირებული.

"როდესაც ნიკა მელიამ ნოემბერში ელექტრონული სამაჯური მოიხსნა, გირაო გირაოთი დაუმძიმეს [...] 23 დეკემბრამდე ჰქონდა ამ თანხის გადახდის ვადა. 23 დეკემბერს რომ არ გადაიხადა, ამის შემდეგ, დაახლოებით თვე-ნახევარ, ანუ დაახლოებით თებერვლის დასაწყისამდე, პროკურატურას არაფერი გაუკეთებია, სასამართლოსთვის არ მიუმართავს და არ მოუთხოვია აღკვეთის ღონისძიების დამძიმება.

პროკურატურამ ეს ბერკეტი ამუშავა მას შემდეგ, რაც ნახეს, რომ მოლაპარაკებებში ოპოზიცია ვერ შეიყვანეს. მე ვფიქრობ, რომ ამით ერთგვარი იძულება უნდოდათ ოპოზიციის, რომ რაღაც კონკრეტული ნაბიჯები გადაედგათ. შეშინება უნდოდათ ოპოზიციის, რომ მოლაპარაკებები გაგრძელებულიყო. თუმცა, მოლაპარაკებების იძულებით გაგრძელება, არ არის ჯანსაღი პროცესი", — განაცხადა ნიკა სიმონიშვილმა.

ნიკა მელია 23 თებერვალს დააკავეს. მას თბილისის საქალაქო სასამართლომ აღკვეთის ღონისძიება 17 თებერვალს დაუმძიმა და გირაო პატიმრობით შეუცვალა.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს, საზოგადოებრივი თავშეყრის ადგილას საჯარო განცხადების გაკეთებისას, მელიამ ელექტრონული მონიტორინგისთვის განკუთვნილი სამაჯური მოიხსნა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 000 ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობად 70 ათას ლარი შეუფარდა.