ქართული სცენის ლეგენდის, ნანი ბრეგვაძის, პირველი ვინილისა და ბიოგრაფიული წიგნის გამოცემის შემდეგ, თიბისი კონცეპტის ინიციატივითა და მხარდაჭერით ნანი ბრეგვაძის და Kordz-ის ერთობლივად შექმნილ სიმღერაზე — მთვარეო — ვიდეორგოლი შეიქმნა.

ყველასათვის საყვარელი სიმღერა გზები მაინც გამინათე მთვარეო 1973 წელს, კინოფილმისთვის ვერის უბნის მელოდიები, მორის ფოცხიშვილის ტექსტზე გოგი ცაბაძემ შექმნა. ფილმში სიმღერას ნანი ბრეგვაძე ასრულებს, მას შემდეგ ის ნანის შემოქმედების განუყოფელი ნაწილი გახდა.

ალექსანდრე კორძაიამ (Kordz) ამ სიმღერაზე ნანისთან ერთად იმუშავა და ხელოვანებმა ახალი ვერსია შემოგვთავაზეს.

“ნანისთან ერთად ვიმუშავე ჩემთვის ერთ-ერთ საყვარელ ქართულ სიმღერაზე, რომელიც მან პირველად 1973 წელს ჩაწერა. მთელი ეს პროცესი ჩემთვის ძალიან ემოციური და მნიშვნელოვანი იყო” — ამბობს ალექსანდრე კორძაია.

სიმღერის ახლებური ვერსიის შექმნის ერთ-ერთი მთავარი მიზეზი მისი ახალი თაობისთვის განსხვავებულად წარმოჩენა და სიმღერისთვის ახალი სიცოცხლის შეძენა იყო.