ოცნების ხელისუფლების არჩეული პრეზიდენტი მიხეილ ყაველაშვილი აშშ-ის სახელმწიფო მდივნის, მარკო რუბიოს განცხადებას ტელეკომპანია იმედის ეთერში გამოეხმაურა.

ყაველაშვილმა განაცხადა, რომ რუბიოს პასუხით კმაყოფილია.

"ჩვენ მზად ვართ, მაშინაც ვამბობდით, ახლაც ვამბობთ, რომ აუცილებელია [ურთიერთობების] გადატვირთვა. თუნდაც გუშინ გამოჩნდა იმ კითხვიდან გამომდინარე, რომ არ შეიძლება სახელმწიფოებს შორის მსგავსი დამოკიდებულება და სპეკულაციური ინფორმაციის ფონზე მოსთხოვო შენს ხელისუფალს, რომ ამ ინფორმაციის საფუძველზე ჰქონდეს ესა თუ ის რეაქცია ამა თუ იმ ქვეყანასთან. პრინციპში, გუშინ დიპლომატიურად გასცა მან პასუხი და მე კმაყოფილი ვარ ამ პასუხით, რადგან ეს ჩანს თავისთავად", — განაცხადა მიხეილ ყაველაშვილმა.

რაც შეეხება ჟურნალისტის კითხვას "ანტიამერიკულ მთავრობასთან" დაკავშირებით, ყაველაშვილმა განაცხადა, რომ ეს პასუხი ჯო უილსონის კითხვიდან იყო გამომდინარე.

"ეს იყო კითხვიდან გამომდინარე, თუმცა ესეც არის ხომ, რა იგულისხმება ანტიამერიკული ხელისუფლება.... როგორ უნდა აიხსნას ეს ყველაფერი. ამაზე ჰქონდა მინიშნება, რომ ეს ყველაფერი არის გასარკვევი", — თქვა ყაველაშვილმა.

შეგახსენებთ, რომ 21 მაისს, აშშ-ის კონგრესის ქვედა პალატის, წარმომადგენელთა პალატის საგარეო საქმეთა კომიტეტის სხდომაზე აშშ-ის სახელმწიფო მდივანმა, მარკო რუბიომ ქართული ოცნების მთავრობა "ანტიამერიკული მთავრობის" კონტექსტში მოიხსენია.