2023 წლის 18 ივნისს, ტურისტული წყალქვეშა ნავი "ტიტანი", რომელიც ჩაძირული ტიტანიკისკენ მიემგზავრებოდა, გაუჩინარდა. კომპანია OceanGate-ის კუთვნილი ხომალდის ბორტზე მყოფ 5 ადამიანთან კავშირი წყალში ჩაშვებიდან საათისა და 45 წუთის შემდეგ გაწყდა. როგორც მოგვიანებით გაირკვა, წყალქვეშა ნავიც და მისი ყველა მგზავრიც შიგნით მიმართულ აფეთქებას, იმავე იმპლოზიას, ემსხვერპლნენ.

ამბავს მსოფლიო მედიასა და ინტერნეტში დიდი გამოხმაურება მოჰყვა. გასულ წელს შევიტყვეთ ისიც, რომ კატასტროფის შესახებ დოკუმენტურ ფილმს იღებდნენ. ფილმს, სახელწოდებით ტიტანი: OceanGate-ის კატასტროფა, ნეტფლიქსზე სულ მალე, 11 ივნისს, ვიხილავთ, მანამდე კი შეგვიძლია ტრეილერს შევავლოთ თვალი.

"რაც უფრო ღრმად იყურები, მით მეტად ბნელა", — ასეთი შესავალი უძღვის წინ თითქმის 2-საათიან დოკუმენტურ ნამუშევარს, რომელიც იკვლევს, როგორ და რატომ დასრულდა ტრაგიკულად სარისკო რეისი.

"'ტიტანის' წყალქვეშა ნავის ავბედითმა გამგზავრებამ ჩაძირული ტიტანიკისკენ 2023 წლის ივნისში ყველას ყურადღება მიიქცია, მაგრამ შოკისმომგვრელი გადაწყვეტილებები, რომლებიც კატასტროფას წინ უძღოდა, აქამდე არ გამხდარა ცნობილი", — ვკითხულობთ ფილმის აღწერაში.

OceanGate-ის წყალქვეშა ხომალდის კატასტროფას კომპანიის დირექტორი სტოქტონ რაშიც შეეწირა. მოგვიანებით გავრცელებული ინფორმაციით, რაშმა იცოდა, რომ "ტიტანი" წესების დარღვევით იყო აგებული და მოსალოდნელი კატასტროფის შესახებაც არაერთხელ გაფრთხილებულა.

"ტიტანის" გაუჩინარებიდან რამდენიმე დღეში, ჩაძირული ტიტანიკის ნამსხვრევებიდან ასეულობით მეტრის დაშორებით წყალქვეშა ნავის ნარჩენებიც იპოვეს, რითაც საბოლოოდ დადასტურდა, რომ ხომალდმა კატასტროფული იმპლოზია განიცადა და წამის მეოცედში სრული განადგურება მოხდა.

ასევე იხილეთ: